Kun.uz нашрида «Дунёдан ортда қолаётган Ўзбекистон ИИВ. Пойтахт кўчаларида мопед ва скутерларга «ов» бошланди» номли материал эълон қилинганди. Унда Тошкент шаҳрида скутер ва мопед эгалари ушбу транспорт воситаларини «А» тоифадаги ҳайдовчилик гувоҳномасига эга бўлмасдан бошқараётгани учун жаримага тортилиб, транспорт воситаси жарима майдончасига жойлаштирилаётгани ҳақида сўз борган. Йўл ҳаракати хавфсизлиги хизмати ушбу ҳолат юзасидан муносабат билдирди.
Таъкидланишича, Вазирлар Маҳкамасининг «Йўл ҳаракати қоидалари»ни тасдиқлаш ҳақидаги 172-сонли қарори 1-иловаси 8-бандига кўра ҳайдовчи тегишли тоифадаги транспорт воситасини бошқариш ҳуқуқини берувчи ҳайдовчилик гувоҳномасига эга бўлиши шарт, бунда:
«А» — мопед, мотоцикл ва уларга тенглаштирилган мототранспорт воситалари бошқаришга рухсат этилиши кўрсатилган бўлиб, 6-банди «мопед» сўзига тушунча берилган.
Яъни мопед — энг юқори конструктив тезлиги соатига 50 километрдан, иш ҳажми 50 см3 дан ошмайдиган ички ёнув двигателига эга бўлган ёки номинал (белгиланган) қуввати 0,25 киловаттдан ортиқ ва 4 киловаттдан кам бўлган электр двигателли икки ёки уч ғилдиракли транспорт воситаси. Худди шундай тавсифларга эга бўлган квадритцикл (квадратцикл), тритцикл, скутер ҳамда йўлнинг қатнов қисмида ҳаракатланишига мослаштирилган бошқа механик мосламалар ҳам мопедларга тенглаштирилиши кўрсатиб қўйилган.
Вазирлар Маҳкамасининг «Йўл ҳаракати қоидалари»ни тасдиқлаш ҳақидаги 172-сонли қарори билан тасдиқланган «Йўл ҳаракати қоидалари» Ўзбекистон ҳудудида йўл ҳаракатининг ягона тартибини белгилайди.
Ҳурматли ҳайдовчилар, мазкур «Йўл ҳаракати қоидалари»га асосан барча энг юқори конструктив тезлиги соатига 50 километрдан, иш ҳажми 50 см3 дан ошмайдиган ички ёнув двигателига эга бўлган ёки номинал (белгиланган) қуввати 0,25 киловаттдан ортиқ ва 4 киловаттдан кам бўлган электр двигателли икки ёки уч ғилдиракли транспорт воситаси, худди шундай тавсифларга эга бўлган квадритцикл (квадратцикл), тритцикл, скутер ҳамда йўлнинг қатнов қисмида ҳаракатланишига мослаштирилган бошқа механик мосламаларни бошқариш учун ҳам «А» тоифали ҳайдовчилик гувоҳномасига эга бўлиши лозимлигини эслатиб ўтамиз, — дейилган муносабатда.
Изоҳ (0)