Prezident Shavkat Mirziyoyev taklifi va tashabbusi bilan Qashqadaryo viloyatining Dehqonobod tumani pistachilikka ixtisoslashtirilib, pista plantatsiyalari tashkil etilgan. Tumanda 367 gektar lalmi yerga pista plantatsiyasini tashkil qilgan tadbirkor Vahob Norsafarov nari borsa ikki-uch yildan so‘ng yiliga 1 million dollardan daromad olishi mumkinligini aytmoqda.
Jurnalist Murodjon Amirov tadbirkorni suhbatga tortib, lalmi va qaqragan yerlardan daromad olish sirlarini so‘radi.
Prezidentimiz Shavkat Mirziyoyevning lalmi, sug‘orilmaydigan yerlar samaradorligini oshirish maqsadida bergan topshiriqlari asosida pistachilik plantatsiyasini yaratdik. Tuman hokimi Zoir Aliqulov yordami bilan pista plantatsiyasini yaratish loyihasini ham ishlab chiqdik. Loyihani ishlab chiqishdan oldin tajriba sifatida 550 tup pista ko‘chatini ekdik. Oradan 6 yil o‘tib, tajriba sifatida ekilgan 1 gektar maydondagi pistalar hosilga kirdi. Hozirgi kunda 10 ta doimiy ish o‘rni yaratilgan. Sug‘orish hamda dala ishlari uchun 50 nafardan 100 nafargacha mavsumiy ishchi jalb qilingan, — deydi tumandagi “Eko komfort” xususiy korxonasi rahbari Vahob Norsafarov.
Dehqonobod tumani hokimi Zoir Aliqulovning ta’kidlashicha, hududda 367 gektar maydonda pistachilik plantatsiyasi tashkil qilingan.
Loyihani boshlash uchun tadbirkor o‘z mablag‘lari hisobidan 2,7 milliard so‘m sarflagan bo‘lsa, bankdan 3,1 milliard so‘m kredit ajratilgan. Kelajakda tumandagi jami 2,5 ming gektar maydonda mana shu tajriba ommalashtirilib, pistachilik plantatsiyasi yaratiladi, — deydi tuman hokimi Zoir Aliqulov.
Tuman hokimining tushuntirishicha, hududda pista ko‘chatlari dastlab maxsus maydonchada ko‘kartirilib olingach, plantatsiya maydoniga ko‘chiriladi. Va shu tariqa o‘sishda davom etadi.
Hokimning qo‘shimcha qilishicha, tadbirkor Vahob Norsafarov tomonidan tashkil qilingan ushbu plantatsiyani chorva mollaridan asrash uchun uzunligi 17 km bo‘lgan sim to‘siqlar o‘rnatilgan.
Pista plantatsiyalarining yana bir muhim jihati u yerda nafaqat pista, kavrak ham o‘stiriladi. Kavrak shirasi ham serdaromad mahsulot olib, tadbirkor undan ham daromad oladi, — deydi Zoir Aliqulov.
Tadbirkor Vahob Norsafarovga yuzlanib, lalmi yerda ko‘chat ko‘kartirish mashaqqati cho‘chitmadimi deya so‘raymiz.
Dastlab bu o‘ylov ham bo‘ldi. Ammo bu bizning rejamizga xalal bermadi. Boisi, pista ko‘chatlarini sun’iy suv havzalari orqali tomchilatib sug‘orish amaliyotini yo‘lga qo‘yganmiz. Qolaversa bu borada tuman mas’ullari ham ko‘mak berib, yil qurg‘oqchil kelganda suv yetkazib berishda yordam berishdi. To‘g‘ri, qiyinchilik va mashaqqat bo‘ldi. Ammo ko‘rsatilgan yordam va mehnatimiz evaziga bu mashaqqatni ham yengib o‘tdik, — deydi tadbirkor.
Vahob Norsafarovning ma’lumot berishicha, pista juda serdaromad mahsulot bo‘lib, dastlabki yillarda pista daraxti o‘rtacha 1 kilogrammdan hosil bersa ham yiliga 100 tonna pista hosili olinadi. Taxminiy iqtisodiy ko‘rsatgichlar bo‘yicha 1 kilogramm pistaning o‘rtacha narxi 10 dollarni tashkil qilsa, eng kam daromad 1 million dollar bo‘ladi.
Qurg‘oqchil kelgan yillarda loyiha taqdiriga viloyat hokimiligi ham tuman hokimi Zoir Aliqulov boshchiligidagi jamoa ham befarq bo‘lmay, sug‘orish ishlari bo‘yicha barcha yordamlarini ayamadi. Buning uchun ularga tashakkur aytaman va kelajakda tuman rivoji uchun xizmat qilaman, — deydi tadbirkor.
Izoh (0)