Andijon viloyati sog‘liqni saqlash boshqarmasiga tadbirkor-farmatsevt Jur’atbek Quvvatov rahbar etib tayinlandi. Bu haqda 18-oktabr kuni boshqarmada o‘tkazilgan yig‘ilishda viloyat hokimi o‘rinbosari Nasibillo Mo‘minov ma’lum qildi, deya xabar berdi “Daryo” muxbiri.
Jur’atbek Quvatov 1986-yil Andijon shahrida tug‘ilgan bo‘lib, 2008-yilda Toshkent farmatsevtika institutini tamomlagan. Ish faoliyatini “Zamin baraka imkoni” mas’uliyati cheklangan jamiyati dorixona mudirligidan boshlagan. Turli yillarda dori vositalari ekspertizasi va standartizatsiyasi davlat markazi Andijon viloyati bo‘limi sertifikatlashtirish bo‘yicha eksperti, Andijon dori vositalari tibbiy buyumlar va tibbiy texnika ekspertizasi va standartlashtirib sho‘ba korxonasi direktori vazifalarida faoliyat olib borgan. 2018-yildan buyon “Andijonfarm erkin iqtisodiy zonasi” direksiyasi rahbari lavozimida ishlab kelayotgan edi.
U viloyatdagi yirik farmatsevt tadbirkorlardan biri bo‘lib, ayni paytda “Makro farm academy” nodavlat ta’lim muassasasi, “Makro farm al-sansar” qo‘shma korxonasi, mevali daraxtlar, butalar va yong‘oqlarning boshqa turlarini yetishtirishga ixtisoslashtirilgan “Makro texnoagro biznes” fermer xo‘jaligi, tibbiy va stomatologiya asboblari va jihozlari ishlab chiqaruvchi “Makro Farm Andijan” MCHJ ta’sischisi hisoblanadi. Bundan tashqari 2020-yildan buyon “Andijon” futbol klubiga ham egalik qilib kelmoqda.
2020-yilning dekabr oyidan buyon viloyat Sog‘liqni saqlash boshqarmasiga rahbarlik qilib kelayotgan Salohiddin Yusupov salomatligi tufayli o‘z xohishiga ko‘ra lavozimidan ozod etilgani, uning o‘rniga boshqarma boshlig‘i vazifasini vaqtincha bajarish avval shu lavozimda ishlagan Qudrat Yarqulov tayinlangani haqida xabar berilgandi.
Izoh (0)