“Daryo” nashri 18-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Oliy Radaga Eron bilan diplomatik aloqalarni uzish va respublikani “terrorizm homiysi” deb tan olish haqidagi qonun loyihasi kiritildi
Ukrainalik deputat Aleksey Goncharenko Oliy Radaga Eron bilan diplomatik aloqalarni uzish va respublikani “terrorizm homiysi” deb tan olish haqidagi qonun loyihasini yo‘naltirganini ma’lum qildi. Bu haqda u o‘z Telegram kanalida yozgan.
Bundan tashqari, u parlamentga BMT, Yevroparlament, Yevropa kengashi Parlament assambleyasi, NATO va boshqa xalqaro tashkilotlarga, shuningdek, uchinchi mamlakatlar hukumatlariga murojaat qilib, Eronni terrorizm homiysi deb tan olishga va unga nisbatan yangi sanksiyalar kiritishga chaqirishni taklif etdi. 17-oktabr kuni Ukraina Tashqi ishlar vazirligi Eronni Rossiyaga qurol yetkazib berishda ayblagandi.
The Washington Post nashri da’vo qilishicha, Rossiya Federatsiyasi, go‘yoki, Eron bilan qurol-yarog‘ yetkazib berish haqida yangi kelishuvlar imzolagan, ular doirasida Rossiya qo‘shinlari birinchi marta “yer-yer” sinfidagi Eron ballistik raketalari va uchuvchisiz uchar qurilmalar partiyasini qabul qilib oladi.
Ayni paytda Estoniya parlamenti Rossiyani terrorizmga homiylik qiluvchi davlat deb e’lon qildi. Bu haqda Riygikogu (parlament) saytida ma’lum qilingan.
Ukraina Oliy Radasi Ichkeriya suverenitetini tan oldi
Ukrainada Oliy rada Ichkeriya suverenitetini tan oldi, parlament qarorini 287 nafar xalq deputatlari qo‘llab-quvvatladi. Hujjatda chechen xalqiga nisbatan amalga oshirilgan genotsid qoralanadi va Checheniston Ichkeriya Respublikasi suvereniteti tan olinadi hamda u Rossiya tomonidan BMT Ustaviga zid holda qurolli tajovuz natijasida vaqtinchalik bosib olingan hudud deb e’tirof etiladi.
Shuningdek, Ukraina parlamenti a’zolari BMT davlatlari va xalqaro tashkilotlarni “vaqtinchalik bosib olingan Checheniston Ichkeriya Respublikasi hududida amalga oshirilgan xalqaro jinoyatlar tegishlicha va xolisona tekshirilishini ta’minlab, aybdorlarni javobgarlikka tortish”ga chaqirdi.
Kreml butun mamlakat bo‘ylab safarbarlik yakunlanishi masalasiga oydinlik kiritdi
Rossiya prezidenti Vladimir Putin butun mamlakat bo‘ylab safarbarlikni yakunlash haqida hozircha qaror qabul qilgani yo‘q, deya ma’lum qildi davlat rahbari matbuot kotibi Dmitriy Peskov.
Jurnalistning Putin Moskva va Podmoskovyedan o‘rnak olgan holda butun mamlakat bo‘ylab qisman safarbarlikni tugatishni rejalashtiryaptimi, yo‘qmi mazmunidagi savoliga javoban shunday dedi: “Hozircha bunday qaror bo‘lgani yo‘q. Bilasizmi, Mudofaa vazirligi tomonidan har bitta hudud uchun safarbar etiluvchilar soni bo‘yicha ko‘rsatkichlar belgilangan. Va hududlar safarbarlik vazifalari bajarilganini ma’lum qilmoqda.
Shu tariqa qisman safarbarlik jarayonining o‘zi bu vazifa amalga oshirilgan hududlarda to‘xtatilgan. Safarbarlikni yakunlash bo‘yicha prezident farmoniga kelsak, u hozircha yo‘q”. Peskovning aytishicha: “Putinning farmonida 300 ming kishini safarbar qilish nazarda tutilgan va bu raqamlar oshmaydi”
Mask: “SpaceX Ukrainada Starlink faoliyatini moliyalashtirish haqida Pentagonga yuborgan so‘rovini qaytarib oldi”
SpaceX kompaniyasi AQSH Mudofaa vazirligiga Ukrainada Starlink terminallari faoliyatini moliyalashtirish haqida kiritgan so‘rovini qaytarib oldi. Bu haqda kompaniya egasi Ilon Mask ma’lum qildi.
Oq uy Starlink Ukraina uchun muhim ekanini tushunishlarini bildirib, “Ukraina tomoni aytayotgan bu ehtiyojlarni yaxshiroq ta’minlash” variantlarini ko‘rib chiqayotganini ma’lum qildi.Mask ayni vaqtda Rossiya Ukrainada Starlinkni “o‘ldirishga” urinayotganini, chunki bu tarmoq — jangovar harakatlar zonasida ishlashda davom etayotgan yagonasi ekanini aytdi. “Uni himoya qilish uchun SpaceX juda katta resurslarni yo‘naltirdi. Hatto shunday holatda ham Starlink baribir o‘lishi mumkin”, — dedi biznesmen.
Avvalroq Ilon Mask Qrimning Rossiya uchun muhimligini ta’kidlab, yadro urushi xavfidan ogohlantirgan edi. “Birovga yoqadimi, yo‘qmi, Qrim Rossiya tomonidan mutlaqo mamlakatning asosiy qismi sifatida ko‘riladi. Qrim janubiy dengiz bazasi bo‘lgani sababli Rossiyaning milliy xavfsizligi uchun ham juda muhim. Moskva nuqtayi nazari bo‘yicha Qrimning boy berilishi Qo‘shma Shtatlar uchun Gavayi va Perl-Harborni yo‘qotish bilan barobar”, — dedi u.Amerikalik tadbirkor yadro quroli borasida ham o‘z fikrini bildirdi va yadro urushi xavfidan ogohlantirdi.
“Agar Rossiya o‘z armiyasini yo‘qotib, NATOdan to‘liq mag‘lubiyatga uchrasa, u yadro qurolidan foydalanadi, keyin NATO yadro quroli bilan javob beradi va shu bilan sivilizatsiya tugaydi”, — deb da’vo qildi Mask.
Toshkent havosining sifatsizligi va zararliligi bo‘yicha dunyoda bugun ham 1-o‘rinda
Ayni paytda Toshkent shahrida yog‘ingarchilik kuzatilmoqda. Ammo shahar havosi iflos va sifatsizligi bo‘yicha 18-oktabr soat 12:33 holatiga dunyoda 1-o‘rinda turibdi. Bu haqda AQSHning Havo sifati indeks platformasi reytingi xabar bermoqda.
Platformada Toshkent havosi 168 birlik, ya’ni inson sog‘lig‘i uchun zararli darajada qayd etilgan. Mutaxassislar 151 birlikdan 200 birlikkacha bo‘lgan havo sifatini salomatlik uchun zararli degan xulosa bergan. Agar bu ko‘rsatkich 201 dan 300 gacha bo‘lsa, juda zarurli, 300 birlikdan oshganda esa xavfli nuqtaga yetadi. Kecha, 17-oktabr kuni soat 22:00 holatiga poytaxtda havoning ifloslanish darajasi 288 birlikka ko‘tarilgandi.
Izoh (0)