17-oktabr kuni investitsiyalar va tashqi savdo vaziri Jamshid Xo‘jayev AQSH savdo vaziri o‘rinbosari Marisa Lago bilan uchrashdi. Bu haqda ITSV axborot xizmati xabar qildi.
Qayd etilishicha, muloqot chog‘ida ikki davlat o‘rtasidagi savdo-iqtisodiy munosabatlarning bugungi holati va ularni rivojlantirish istiqbollari muhokama qilingan.
So‘nggi bir necha yil ichida O‘zbekistonda AQSH kapitali ishtirokidagi korxonalar soni ikki barobarga ko‘payib, 315 taga yetgan. Ikki tomonlama Investitsiyaviy bitimni imzolash jarayonini tezlashtirish, Amerika kompaniyalari va moliya institutlarini O‘zbekistonda tog‘-kon, kimyo va neft-kimyo sanoati, qishloq xo‘jaligi, to‘qimachilik sanoati va boshqa sohalarda qo‘shma loyihalarni amalga oshirishga jalb etish bo‘yicha hamkorlikni faollashtirish bo‘yicha kelishuvga erishilgan.
O‘zaro tovar ayirboshlash hajmini oshirish istiqbollari muhokama qilingan. Tomonlar o‘zaro tovar ayirboshlashda ijobiy tendensiyani qayd etgan. Bu ko‘rsatkich 2021-yilda 53 foizga oshib, qariyb yarim milliard dollarga yetgan va 2022-yilning yanvar—avgust oylarida esa yana 8,7 foizni tashkil etgan.
O‘zbekiston—AQSH ikki tomonlama savdo hajmini oshirish uchun shart-sharoitlar yaratish, jumladan, ikki tomonlama mahsulot yetkazib berish hajmini oshirish maqsadida transport yo‘laklarini diversifikatsiya qilish jarayonini moliyaviy va texnik jihatdan qo‘llab-quvvatlash bo‘yicha hamkorlikdagi ishlarni davom ettirishga tayyorlik bildirilgan.
O‘zbekistonning JSTga a’zo bo‘lishi jarayonida, AQSH tomonidan, boshqa uslublar qatorida, USAID’ning texnik ko‘mak loyihasini amalga oshirish orqali har tomonlama qo‘llab-quvvatlangani uchun minnatdorlik bildirilgan. Tomonlar O‘zbekistonning ushbu tashkilotga tezroq a’zo bo‘lishi maqsadida yaqin hamkorlikni davom ettirishga kelishib olgan.
Muzokaralar yakunida tomonlar O‘zbekiston va AQSH o‘rtasidagi iqtisodiy hamkorlik salohiyatini maksimal darajada ro‘yobga chiqarish uchun muhokama qilingan barcha masalalar bo‘yicha faol va doimiy muloqotni davom ettirish tarafdori ekanini bildirgan.
Izoh (0)