Ijtimoiy tarmoqlarda “Nishonlik maktab o‘quvchilari paxta terimiga jalb etildi” mazmunidagi murojaat e’lon qilingandi. Holat yuzasidan Qashqadaryo viloyati xalq ta’limi boshqarmasi munosabat bildirdi.
Qayd etilishicha, murojaat viloyat xalq ta’limi boshqarmasi, Nishon tumani hokimligi bolalarni himoya qilish sho‘basi hamda huquqni muhofaza qiluvchi organ xodimlari ishtirokida atroflicha o‘rganildi. Ma’lum bo‘lishicha, 15-oktabr kuni 109-sonli otryad rahbari S.N. boshchiligidagi 80 nafar terimchi Nishon tumani “Oydin” mahallasi hududidagi “Uch botir” fermer xo‘jaligi dala maydonida terimda ishtirok etgan.
Shu kuni soat 15:00 da terimchi D.E. sog‘ligida yuzaga kelgan o‘zgarish sababli ahvoli yomonlashgan va oila a’zolariga qo‘ng‘iroq qilib (farzandiga), doimiy ravishda iste’mol qilib kelgan “Sitramon” va “Erinit” dori-darmonlarini yetkazib berishlarini so‘ragan. Zarur dorilar terimchi D.E.ning voyaga yetmagan farzandi U.N. (2009-yilda tug‘ilgan) tomonidan dala maydoniga olib kelinib, yordam ko‘rsatilgan.
Shuningdek, terimchi Z.J.ning iltimosiga ko‘ra voyaga yetmagan farzandi O.N. (2007-yilda tug‘ilgan) tomonidan zarur bo‘lgan mahsulotlar yetkazib berilgan. O‘rganishda voyaga yetmagan U.N. Nishon tumanidagi ixtisoslashtirilgan maktabning 7-sinfida va voyaga yetmagan O.N. Nishon tuman xalq ta’limi bo‘limiga qarashli 18-sonli umumta’lim maktabning 9-sinfida ta’lim olib kelayotgani va 15-oktabr kuni soat 12:30 ga qadar dars mashg‘ulotlarida to‘liq ishtirok etgani aniqlangan.
Tarmoqlarda yoritilgan qo‘shimcha fototasvirda esa fermer xo‘jaligi rahbari A.E.ning 2 nafar bog‘cha yoshidagi voyaga yetmagan nabirasi oila a’zolari bilan birgalikda dala maydoniga kelganliklari aniqlangan (paxta terimiga jalb qilinmagan). O‘rganish yakuniga ko‘ra, ijtimoiy tarmoqlarda yoritilgan maqoladagi holatlar o‘z tasdig‘ini topmaganini ma’lum qilamiz, — deyiladi munosabatda.
Izoh (0)