«Дарё» нашри 18 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Олий Радага Эрон билан дипломатик алоқаларни узиш ва республикани «терроризм ҳомийси» деб тан олиш ҳақидаги қонун лойиҳаси киритилди
Украиналик депутат Алексей Гончаренко Олий Радага Эрон билан дипломатик алоқаларни узиш ва республикани «терроризм ҳомийси» деб тан олиш ҳақидаги қонун лойиҳасини йўналтирганини маълум қилди. Бу ҳақда у ўз Telegram каналида ёзган.
Бундан ташқари, у парламентга БМТ, Европарламент, Европа кенгаши Парламент ассамблеяси, НАТО ва бошқа халқаро ташкилотларга, шунингдек, учинчи мамлакатлар ҳукуматларига мурожаат қилиб, Эронни терроризм ҳомийси деб тан олишга ва унга нисбатан янги санкциялар киритишга чақиришни таклиф этди. 17 октябрь куни Украина Ташқи ишлар вазирлиги Эронни Россияга қурол етказиб беришда айблаганди.
The Washington Post нашри даъво қилишича, Россия Федерацияси, гўёки, Эрон билан қурол-яроғ етказиб бериш ҳақида янги келишувлар имзолаган, улар доирасида Россия қўшинлари биринчи марта «ер-ер» синфидаги Эрон баллистик ракеталари ва учувчисиз учар қурилмалар партиясини қабул қилиб олади.
Айни пайтда Эстония парламенти Россияни терроризмга ҳомийлик қилувчи давлат деб эълон қилди. Бу ҳақда Рийгикогу (парламент) сайтида маълум қилинган.
Украина Олий Радаси Ичкерия суверенитетини тан олди
Украинада Олий рада Ичкерия суверенитетини тан олди, парламент қарорини 287 нафар халқ депутатлари қўллаб-қувватлади. Ҳужжатда чечен халқига нисбатан амалга оширилган геноцид қораланади ва Чеченистон Ичкерия Республикаси суверенитети тан олинади ҳамда у Россия томонидан БМТ Уставига зид ҳолда қуролли тажовуз натижасида вақтинчалик босиб олинган ҳудуд деб эътироф этилади.
Шунингдек, Украина парламенти аъзолари БМТ давлатлари ва халқаро ташкилотларни «вақтинчалик босиб олинган Чеченистон Ичкерия Республикаси ҳудудида амалга оширилган халқаро жиноятлар тегишлича ва холисона текширилишини таъминлаб, айбдорларни жавобгарликка тортиш»га чақирди.
Кремль бутун мамлакат бўйлаб сафарбарлик якунланиши масаласига ойдинлик киритди
Россия президенти Владимир Путин бутун мамлакат бўйлаб сафарбарликни якунлаш ҳақида ҳозирча қарор қабул қилгани йўқ, дея маълум қилди давлат раҳбари матбуот котиби Дмитрий Песков.
Журналистнинг Путин Москва ва Подмосковедан ўрнак олган ҳолда бутун мамлакат бўйлаб қисман сафарбарликни тугатишни режалаштиряптими, йўқми мазмунидаги саволига жавобан шундай деди: «Ҳозирча бундай қарор бўлгани йўқ. Биласизми, Мудофаа вазирлиги томонидан ҳар битта ҳудуд учун сафарбар этилувчилар сони бўйича кўрсаткичлар белгиланган. Ва ҳудудлар сафарбарлик вазифалари бажарилганини маълум қилмоқда.
Шу тариқа қисман сафарбарлик жараёнининг ўзи бу вазифа амалга оширилган ҳудудларда тўхтатилган. Сафарбарликни якунлаш бўйича президент фармонига келсак, у ҳозирча йўқ». Песковнинг айтишича: «Путиннинг фармонида 300 минг кишини сафарбар қилиш назарда тутилган ва бу рақамлар ошмайди»
Маск: «SpaceX Украинада Starlink фаолиятини молиялаштириш ҳақида Пентагонга юборган сўровини қайтариб олди»
SpaceX компанияси АҚШ Мудофаа вазирлигига Украинада Starlink терминаллари фаолиятини молиялаштириш ҳақида киритган сўровини қайтариб олди. Бу ҳақда компания эгаси Илон Маск маълум қилди.
Оқ уй Starlink Украина учун муҳим эканини тушунишларини билдириб, «Украина томони айтаётган бу эҳтиёжларни яхшироқ таъминлаш» вариантларини кўриб чиқаётганини маълум қилди.Маск айни вақтда Россия Украинада Starlinkни «ўлдиришга» уринаётганини, чунки бу тармоқ — жанговар ҳаракатлар зонасида ишлашда давом этаётган ягонаси эканини айтди. «Уни ҳимоя қилиш учун SpaceX жуда катта ресурсларни йўналтирди. Ҳатто шундай ҳолатда ҳам Starlink барибир ўлиши мумкин», — деди бизнесмен.
Аввалроқ Илон Маск Қримнинг Россия учун муҳимлигини таъкидлаб, ядро уруши хавфидан огоҳлантирган эди. «Бировга ёқадими, йўқми, Қрим Россия томонидан мутлақо мамлакатнинг асосий қисми сифатида кўрилади. Қрим жанубий денгиз базаси бўлгани сабабли Россиянинг миллий хавфсизлиги учун ҳам жуда муҳим. Москва нуқтаи назари бўйича Қримнинг бой берилиши Қўшма Штатлар учун Гавайи ва Перл-Ҳарборни йўқотиш билан баробар», — деди у.Америкалик тадбиркор ядро қуроли борасида ҳам ўз фикрини билдирди ва ядро уруши хавфидан огоҳлантирди.
«Агар Россия ўз армиясини йўқотиб, НАТОдан тўлиқ мағлубиятга учраса, у ядро қуролидан фойдаланади, кейин НАТО ядро қуроли билан жавоб беради ва шу билан цивилизация тугайди», — деб даъво қилди Маск.
Тошкент ҳавосининг сифатсизлиги ва зарарлилиги бўйича дунёда бугун ҳам 1-ўринда
Айни пайтда Тошкент шаҳрида ёғингарчилик кузатилмоқда. Аммо шаҳар ҳавоси ифлос ва сифатсизлиги бўйича 18 октябрь соат 12:33 ҳолатига дунёда 1-ўринда турибди. Бу ҳақда АҚШнинг Ҳаво сифати индекс платформаси рейтинги хабар бермоқда.
Платформада Тошкент ҳавоси 168 бирлик, яъни инсон соғлиғи учун зарарли даражада қайд этилган. Мутахассислар 151 бирликдан 200 бирликкача бўлган ҳаво сифатини саломатлик учун зарарли деган хулоса берган. Агар бу кўрсаткич 201 дан 300 гача бўлса, жуда зарурли, 300 бирликдан ошганда эса хавфли нуқтага етади. Кеча, 17 октябрь куни соат 22:00 ҳолатига пойтахтда ҳавонинг ифлосланиш даражаси 288 бирликка кўтарилганди.
Изоҳ (0)