Farg‘onada mast holda ko‘chada “To‘y bola” qo‘shig‘iga yalang‘och o‘yinga tushgan yigit va bu holatni videoga olib, Tik-Tok'ka joylagan ikki nafar sherigi javobgarlikka tortildi. Bu haqda “Daryo”ga viloyat IIB axborot xizmati ma’lum qildi.
Qayd etilishicha, 2022-yilning 13-oktabr kuni Tik-Tok messenjeriga uch nafar erkak kechqurun ko‘chaning o‘rtasida qo‘shiq aytib, o‘yinga tushayotgani aks etgan video joylangan. Ulardan biri kiyimlarini yechib, jamiyatda yurish-turish qoidalarini buzib, “tomosha” ko‘rsatgan.
Farg‘ona shahar ichki ishlar organlari faoliyatini muvofiqlashtirish boshqarmasi xodimlari tomonidan olib borilgan o‘rganishlar natijasida videotasvirda aks etgan erkaklarning shaxsiga aniqlik kiritlgan.
Mazkur holat yuzasidan yuqoridagi shaxslarga nisbatan ma’muriy tartibda to‘plangan hujjatlar jinoyat ishlari bo‘yicha Farg‘ona shahar sudiga taqdim etilgan.
Sud tomonidan mayda bezorilik sodir etgan, deb topilgan huquqbuzarlarning har biriga 15 sutkadan ma’muriy qamoq jazosi tayinlangan.
Izoh (0)