O‘zbekistonning Saudiya Arabistonidagi elchisi Ulug‘bek Maqsudov Islom hamkorlik tashkiloti (IHT) bosh kotibining gumanitar, madaniy va ijtimoiy masalalar bo‘yicha o‘rinbosari Tarik Baxit bilan uchrashuv o‘tkazdi, deb xabar qilmoqda “Dunyo” axborot agentligi.
Qayd etilishicha, uchrashuv davomida tomonlar 2023-yilning bahorida Samarqand shahrida Musulmon yoshlari forumini o‘tkazish masalalarini muhokama qildi.
Tarik Baxitning ta’kidlashicha, bugungi kunda O‘zbekiston jahon hamjamiyati tomonidan yirik siyosiy, iqtisodiy, ilmiy, madaniy va boshqa tadbirlarni yuqori tashkiliy va asosli darajada o‘tkazish bo‘yicha xalqaro markaz sifatida e’tirof qozondi. U joriy yil 26-iyul kuni Toshkentda bo‘lib o‘tgan “Afg‘oniston: xavfsizlik va iqtisodiy rivojlanish” xalqaro konferensiyasidagi ishtirokini qayd etdi. Tarik Baxit anjuman Afg‘onistondagi vaziyatni barqarorlashtirish va mamlakatning nizodan keyingi tiklanishi uchun mazmunli, majmuaviy va muvofiqlashtirilgan yondoshuvlarni ishlab chiqishga ulkan hissa qo‘shganini ta’kidladi.
“U IHTga a’zo davlatlar ishtirokida O‘zbekistonda Musulmon yoshlar forumini o‘tkazish tashabbusini qo‘llab-quvvatlar ekan, lozim bo‘lsa uni tashkil etishda ko‘maklashishga tayyor ekanligini ma’lum qildi”, — deyiladi xabarda.
Izoh (0)