Toshkentda isitish mavsumi arafasida Veolia Energy Tashkent tomonidan 1600 dan ortiq nosozliklar bartaraf etildi. Bu haqda “Daryo”ga kompaniya matbuot xizmati xabar berdi.
Ma’lum qilinishicha, so‘nggi 3 oy davomida korxona tomonidan dastlabki audit o‘tkazilib, 20 ta eng yirik qozonxonada favqulodda holatdagi hududlar aniqlandi, 100 dan ortiq hududda issiqlik tarmoqlarini ko‘chirish ishlari yakunlandi. Issiqlik tarmoqlaridagi 1600 dan ortiq nosozliklar aniqlanib, bartaraf etildi.
“Issiqlik mavsumiga tayyorgarlik ko‘rishda biz e’tiborimizni ko‘ngilsiz hodisalarning oldini olish va nuqsonlarni bartaraf etishga qaratdik. Ushbu mavsumda quvurlarning gidravlik mustahkamlik sinovlari 16 bargacha bo‘lgan bosimlarda o‘tkazildi. Bu o‘tgan yillardagi bosimdan deyarli ikki baravar ko‘p degani. Ushbu o‘sish tufayli biz issiqlik tarmog‘ining korroziya va boshqa zararlardan ta’sirlangan yanada zaif va kuchsiz qismlarini topishga muvaffaq bo‘ldik”, — deydi kompaniya bosh direktori Aleksandr Xasti.
Qayd etilishicha, issiqlik tarmoqlari va jihozlarining salmoqli qismi joriy va kapital ta’mirga muhtoj. Birdaniga butun infratuzilmani almashtirib, mavjud muammolarni hal qilish esa imkonsiz. Muammolarni hal qilishdagi preventiv choralar uzilishlar va sizib chiqishlarning oldini olish imkonini beradi va kuz-qish davrida issiq suv va issiqlik ta’minotining uzilib qolish xavfini minimallashtiradi.
Ayni paytda Toshkent shahridagi qolgan qozonxonalarni tekshirish ishlari davom etmoqda.
Mavzuga doir: Toshkentda issiqlik ta’minoti tariflari tasdiqlandi: aholi va tadbirkorlar uchun narxlar o‘zgarmaydi
Izoh (0)