Тошкентда иситиш мавсуми арафасида Veolia Energy Tashkent томонидан 1600 дан ортиқ носозликлар бартараф этилди. Бу ҳақда «Дарё»га компания матбуот хизмати хабар берди.
Маълум қилинишича, сўнгги 3 ой давомида корхона томонидан дастлабки аудит ўтказилиб, 20 та энг йирик қозонхонада фавқулодда ҳолатдаги ҳудудлар аниқланди, 100 дан ортиқ ҳудудда иссиқлик тармоқларини кўчириш ишлари якунланди. Иссиқлик тармоқларидаги 1600 дан ортиқ носозликлар аниқланиб, бартараф этилди.
«Иссиқлик мавсумига тайёргарлик кўришда биз эътиборимизни кўнгилсиз ҳодисаларнинг олдини олиш ва нуқсонларни бартараф этишга қаратдик. Ушбу мавсумда қувурларнинг гидравлик мустаҳкамлик синовлари 16 баргача бўлган босимларда ўтказилди. Бу ўтган йиллардаги босимдан деярли икки баравар кўп дегани. Ушбу ўсиш туфайли биз иссиқлик тармоғининг коррозия ва бошқа зарарлардан таъсирланган янада заиф ва кучсиз қисмларини топишга муваффақ бўлдик», — дейди компания бош директори Александр Хасти.
Қайд этилишича, иссиқлик тармоқлари ва жиҳозларининг салмоқли қисми жорий ва капитал таъмирга муҳтож. Бирданига бутун инфратузилмани алмаштириб, мавжуд муаммоларни ҳал қилиш эса имконсиз. Муаммоларни ҳал қилишдаги превентив чоралар узилишлар ва сизиб чиқишларнинг олдини олиш имконини беради ва куз-қиш даврида иссиқ сув ва иссиқлик таъминотининг узилиб қолиш хавфини минималлаштиради.
Айни пайтда Тошкент шаҳридаги қолган қозонхоналарни текшириш ишлари давом этмоқда.
Мавзуга доир: Тошкентда иссиқлик таъминоти тарифлари тасдиқланди: аҳоли ва тадбиркорлар учун нархлар ўзгармайди
Изоҳ (0)