“Maksimal 4-5 daqiqangiz bor”. Shuhrat Qurbonov plastik kartadagi pul o‘g‘irlanganda nima qilish kerakligini aytdi

“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 2-soni mehmoni — Telegram’dagi “Kurbanoff.net” kanali muallifi, iqtisodchi Shuhrat Qurbonov bo‘ldi. Ko‘rsatuvning bu galgi mavzusi — onlayn firibgarlik.

Ko‘rsatuv davomida studiyaga “Onlayn firibgarlik yuz berganda, ya’ni plastik kartochkadagi pul o‘g‘irlanganda, kimga murojaat qilish kerak?” degan savol kelib tushgan. Iqtisodchining javobi shunday:

Agar kartadagi pulingizni firibgarlar yechib oladigan bo‘lsa, birinchi qilinadigan harakat bu — kartani blok qilish. Ko‘p bank ilovalarida shunaqa imkoniyat bor. Blok qilish orqali kartadagi qanchadir miqdordagi pul saqlab qolinishi mumkin.

Ikkinchi qilinadigan ish — albatta, huquqni muhofaza qilish organlariga murojaat qilish zarur. Chunki bu yerda jinoyat bo‘lgan. Ular banklardan ma’lumot olgan holda tekshiruv o‘tkazishi mumkin.

Endi har xil holatlarni ko‘rganman, shundan xulosa qiladigan bo‘lsam, maksimal 4—5 daqiqangiz bor. Shu vaqt ichida firibgarlar kartadan kartaga o‘tkazib, zanjir yo‘li bilan pulni chiqarib ketishadi.

Chunki ko‘pchilik savol beradi-da, “Pul kimning kartasi orqali chiqib ketgani ma’lum-ku, nega ushlashmayapti?” deb. Lekin aslida boshqacha. Ular avval sizning plastik karta kodingizni bilvolishadi-da, qaysidir ilovaga ulab qo‘yadi. Keyin menikini ulavolishadi. Qo‘lga tushgan kartalardan shunaqa zanjir qilib, shu kartalar orqali olib chiqib ketishadi.