O‘zbekistonda dam olish kunlari quruq va iliq ob-havo bo‘ladi

Bugun va dam olish kunlari O‘zbekiston hududiga iliq va quruq havo massasi kirib kelishi davom etadi, deb xabar bermoqda “O‘zgidromet”.

Faqat respublikaning shimoliy hududlariga Kaspiy dengizi hududlaridan bulutli massivlar kirib kelishida 15-oktabr kuni beqaror ob-havo bo‘lishi kutilmoqda. Ba’zi joylarda yomg‘ir yog‘adi.

Kunduzgi havo harorati ushbu kunning o‘rtacha me’yoriy qiymatlaridan yuqori bo‘ladi va 26-29 darajani tashkil etadi.

Shimolda va cho‘l hududlarda 16-oktabr shamol 15-20 metr/sekundgacha kuchayishi, ayrim joylarda chang-to‘zonlar kuzatilishi mumkin.

Markaz xabariga ko‘ra, 17-oktabrda O‘zbekistonning shimoliy hududlariga, 18—19-oktabrda respublikaning qolgan hududlariga sovuq va nam havo massalari kirib kelib, harorat pasayishi kutilmoqda. Shu kunlarda qator hududlarda yomg‘ir yog‘adi, tog‘li hududlarda kuchli yog‘ingarchilik bo‘lishi mumkin.

Mavzuga doir: O‘zbekistonda kutilayotgan qish mavsumi uchun taxminiy prognoz e’lon qilindi