Ostonada hindistonlik jamoat arbobi Mahatma Gandining haykali o‘rnatildi. Bu haqda Hindistonning Qozog‘istondagi elchixonasi matbuot xizmatiga tayanib, Tengrinews xabar berdi.
Hindiston tashqi ishlar va madaniyat bo‘yicha davlat vaziri Minakashi Lekxi Ostona shahrida bo‘lib o‘tayotgan Osiyoda hamkorlik va ishonch choralari bo‘yicha sammitga kelgan. Tashrifi chog‘ida vazir Mahatma Gandi tavallud kunining yubileyiga bag‘ishlangan tabiiy o‘lchamdagi haykalning ochilishida ishtirok etgan.
Mahatma Gandi dunyodagi eng taniqli shaxslardan biri. Ko‘pgina mamlakatlarda uning sharafiga haykal o‘rnatilgan. 2003-yilda Qozog‘istonning Olmaota shahrida ham Mahatma Gandiga haykal o‘rnatilgan edi.
“Haykalning o‘rnatilishi bugungi kunda katta ahamiyatga ega, chunki bu yil Hindiston mustaqilligining 75 yilligi hamda Hindiston va Qozog‘iston o‘rtasida diplomatik munosabatlar o‘rnatilganining 30 yilligi nishonlanadi”, — deyilgan elchixona xabarida.
Qayd etilishicha, Qozog‘iston poytaxtida o‘rnatilgan Mahatma Gandi haykali ikki xalq o‘rtasidagi yaqin aloqalarni yanada mustahkamlaydi.
Izoh (0)