O‘zbekiston urush ketayotgan Ukrainada tibbiy ta’limni to‘xtatishga majbur bo‘lgan hindistonlik talabalar uchun o‘z tibbiyot institutlaridan 2000 ta o‘rin ajratmoqda. Bu haqda O‘zbekistonning Hindistondagi elchisi ma’lum qildi.
OTMlar o‘rta daromadli oilalarga mansub talabalarni arzon budjet asosida qabul qilib, ularga sifatli ta’lim beradi, o‘qish va turar joy bilan ta’minlaydi, dedi elchi.
Elchining ta’kidlashicha, O‘zbekiston hindistonliklarga tibbiyot bo‘yicha ikkita bakalavriat dasturi: 6 yillik Tibbiyot fanlari doktori darajasi va 5+1 ya’ni 5 yillik Tibbiyot va jarrohlik bakalavriati hamda bir yillik stajirovka bilan ta’lim beradi. Talabalarni FMGE/NEXT imtihoniga tayyorlash uchun universitetda katta zamonaviy infratuzilma, tegishli davlat kasalxonalari va klinikalarida ko‘p sonli o‘quv yotoqlari, shuningdek, qo‘shimcha ta’lim uchun hind va chet ellik professorlar mavjud.
Elchi Buxoro davlat tibbiyot instituti va Toshkent tibbiyot akademiyasi kabi davlat oliy tibbiyot muassasalarida o‘tkazilgan suhbatdan muvaffaqiyatli o‘tgan talabalarga o‘qishga qabul qilingani to‘g‘risidagi xatlarni topshirdi.
O‘zbekiston va Haydarobod o‘rtasidagi Sog‘liqni saqlash almashinuvi dasturi doirasida Sog‘liqni saqlash vazirligi o‘zbekistonlik jarroh va shifokorlarni AIG, Yashodha va Medanta shifoxonalariga bir oylik dasturga yubordi. Elchining aytishicha, koronavirus pandemiyasi va mojarolar tufayli dunyo salomatlik, xavfsizlik va tinchlikka ko‘proq e’tibor qaratmoqda, O‘zbekiston ham shu yo‘nalishdan borib, eng xavfsiz mintaqaga aylanmoqda.
Izoh (0)