Qirg‘iziston Turkiyaning Akıncı modelidagi Bayraktar tezkor-taktik o‘rta balandlikka parvoz qiluvchi uchuvchisiz uchar qurilmasini o‘z arsenaliga qabul qilib oldi. Bu haqda Qirg‘iziston Milliy xavfsizlik davlat qo‘mitasi rahbari Qamchibek Tashiyev Facebook’dagi sahifasida ma’lum qildi.
“Bayraktar Akinci endi bizniki. Qardosh xalqimizga rahmat! 12.10.22-y”, — deyiladi postda.
Bayraktar dronining Akinci modeli qanotlari qulochi 20 metrga yetadi. Maksimal 4500 kg vazn bilan ucha oladi. 24 soatgacha parvoz qiladi. Maksimal tezligi — 360 km/soat, oddiy tezligi — 240 km/soat.
Parvoz-texnik xususiyatlari va gabaritlari bo‘yicha Bayraktar Akinci o‘zidan avvalgi Bayraktar TB2 modelidan sezilarli darajada ustun.
Ayni paytda Milliy xavfsizlik davlat qo‘mitasi va prezident ma’muriyati matbuot xizmati qo‘mita rahbari suratga tushirib joylagan Bayraktar dronlari haqida ma’lumot berishdan bosh tortdi. Uchuvchisiz qurilmalar qanday shartlar bilan va qancha miqdorda sotib olingani noma’lum.
Ushbu dronlarni ishlab chiqaruvchi Turkiyaning birinchi texnologik kompaniyasi — Baykar IG 12-oktabr kuni Özdemir Bayraktar milliy texnologik markaziga qirg‘iz delegatsiyasi tashrif buyurgani haqida yozgan. Ular orasida Vazirlar mahkamasi rahbari Akilbek Japarov, MXDQ rahbari Qamchibek Tashiyev ham bo‘lgan.
Qirg‘iziston MXDQ chegara xizmati 13-sentabr kuni uchuvchisiz uchar qurilmalar bazasini tashkil qildi. U yerga Bayraktar dronlari joylashtirildi, ularni boshqarish esa Chegara xizmatining tegishli tayyorgarlikdan o‘tgan ofitserlariga topshirilgan.
Ijtimoiy tarmoqlarda tarqalgan xabarlarga ko‘ra, Turkiyada ishlab chiqarilgan zarbdor dronlar sentabr o‘rtalarida Tojikiston bilan chegarada yuzaga kelgan so‘nggi ziddiyatda qirg‘iz qo‘shinlari tomonidan qo‘llanilgan.
Izoh (0)