2023-yil 1-yanvardan Turkiyada “yashab turish solig‘i”ni joriy qilish haqidagi qonun kuchga kiradi. Bu haqdagi ma’lumotni Turkiya Moliya vazirligi rasman tasdiqladi, deb yozadi Tengrinews.
“Yashab turish solig‘i” — sayyohlardan o‘zlari yashayotgan mehmonxona hududida ko‘rsatilayotgan barcha xizmatlardan 2 foiz miqdorida olinadigan yig‘im. Qonun loyihasiga muvofiq, stavka muayyan hudud ma’muriyatining ixtiyoriga ko‘ra o‘zgarishi mumkin. To‘lov mehmonxona, kurort majmuasi, apart-otel, mehmon uyi va boshqa joylar hududlarida amalga oshiriladigan barcha xizmatlar, shu jumladan, u yerlarda yashash narxidan ham undiriladi.
To‘lov sayyohlardan qanday undirilishi haqidagi tafsilotlar hozircha noma’lum. Biroq Profi.travel xabariga ko‘ra, qonun loyihasi ko‘rib chiqish uchun taqdim etilganidan buyon sayyohlik biznesi sohasida ko‘plab savollarni keltirib chiqarmoqda. Hujjat matnida aytilishicha, yig‘imni sayyohlar mehmonxonaga joylashish vaqtida to‘lashi kerak, biroq Turkiyaga turistik paketlar doirasida kelayotgan chet elliklar bilan qanday ish tutish haligacha tushunarsiz.
Bozor ishtirokchilari fikricha, eng oson yo‘l yig‘im stavkasini turistik paketlar narxiga qo‘shish bo‘ladi. Mehmonxonalar narxi bir yilda o‘rtacha 10 foizga oshishini hisobga olganda, bunga qo‘shimcha 2 foiz turlarning yakuniy narxiga ko‘p ta’sir qilmaydi, deydi ular.
Turkiya “yashab turish solig‘i”ni joriy etishga 2019-yildayoq qaror qilgandi. O‘shandan buyon qonunni kuchga kiritish bir necha marta, shu jumladan, koronavirus pandemiyasi va sayyohlik sohasidagi pasayishlar tufayli, kechiktirilgandi. Ammo 2022-yilda Turkiyada turizm O‘rtayer dengizi mintaqasidagi eng yaxshi sur’atlar bilan qayta tiklandi, bu esa sayyohlardan olinadigan yig‘imni kiritish uchun turtki berdi.
Izoh (0)