Farg‘onada qarzdorligi sabab elektr va gazdan uzilgan korxona tarmoqqa o‘zboshimchalik bilan qayta ulanib oldi

Ijtimoiy tarmoqlarda Farg‘ona viloyati O‘zbekiston tumanida elektr energiyasi va tabiiy gazdan qarzdorligi mavjud iste’molchilarga tegishli chora ko‘rilmayotgani to‘g‘risida murojaat e’lon qilindi. Ushbu murojaat yuzasidan Energetika vazirligi ma’lumot berdi.

Aniqlanishicha, O‘zbekiston tumanida qurilish materiallari ishlab chiqaruvchi “Great Silk Road Servis” MCHJ (“Greksil”)ning bugungi kunda foydalangan elektr energiyasidan 1 milliard 761,3 million so‘m qarzdorligi mavjud. Qarzdorlikni undirish maqsadida “Farg‘ona hududiy elektr tarmoqlari korxonasi” AJ tomonidan 2022-yil 26-sentabr kuni “O‘zaro hisob-kitoblarni tartibga solish va qarzdorlikni bartaraf etish etish” yuzasidan talabnoma taqdim etilgan.

“Greksil” tomonidan foydalangan elektr energiyasi to‘lovni o‘z vaqtida amalga oshirmagani uchun jamiyat tomonidan 30-sentabr kuni elektr tarmoqlaridan o‘chirilib, elektr energiyasi yetkazib berilishi to‘xtatilgan. Shuningdek, “Greksil” korxonasi yetkazib berilgan tabiiy gazdan 2022-yil 16-sentabr holatiga 517 million so‘m qarzdorligi sabab shu kunning o‘zida tarmoqdan uzilgan.

2022-yil 19-sentabr kuni qayta nazorat qilingan vaqtda o‘zboshimchalik bilan tarmoqqa ulanib olingani aniqlangan. Holat yuzasidan “O‘zbekistontumangaz” gaz ta’minoti bo‘limi tomonidan joyida dalolatnomalar tuzilib, tabiiy gaz tarmog‘idan uzilgan. Shuningdek, 16 ming 956 kub metr tabiiy gaz sarfi qayta hisob qilib berilgan.