Фарғонада қарздорлиги сабаб электр ва газдан узилган корхона тармоққа ўзбошимчалик билан қайта уланиб олди

Ижтимоий тармоқларда Фарғона вилояти Ўзбекистон туманида электр энергияси ва табиий газдан қарздорлиги мавжуд истеъмолчиларга тегишли чора кўрилмаётгани тўғрисида мурожаат эълон қилинди. Ушбу мурожаат юзасидан Энергетика вазирлиги маълумот берди.

Аниқланишича, Ўзбекистон туманида қурилиш материаллари ишлаб чиқарувчи «Great Silk Road Service» МЧЖ («Грексил»)нинг бугунги кунда фойдаланган электр энергиясидан 1 миллиард 761,3 миллион сўм қарздорлиги мавжуд. Қарздорликни ундириш мақсадида «Фарғона ҳудудий электр тармоқлари корхонаси» АЖ томонидан 2022 йил 26 сентябрь куни «Ўзаро ҳисоб-китобларни тартибга солиш ва қарздорликни бартараф этиш этиш» юзасидан талабнома тақдим этилган.

«Грексил» томонидан фойдаланган электр энергияси тўловни ўз вақтида амалга оширмагани учун жамият томонидан 30 сентябрь куни электр тармоқларидан ўчирилиб, электр энергияси етказиб берилиши тўхтатилган. Шунингдек, «Грексил» корхонаси етказиб берилган табиий газдан 2022 йил 16 сентябрь ҳолатига 517 миллион сўм қарздорлиги сабаб шу куннинг ўзида тармоқдан узилган.

2022 йил 19 сентябрь куни қайта назорат қилинган вақтда ўзбошимчалик билан тармоққа уланиб олингани аниқланган. Ҳолат юзасидан «Ўзбекистонтумангаз» газ таъминоти бўлими томонидан жойида далолатномалар тузилиб, табиий газ тармоғидан узилган. Шунингдек, 16 минг 956 куб метр табиий газ сарфи қайта ҳисоб қилиб берилган.