Prognozlashtirish va makroiqtisodiy tadqiqotlar instituti (PMTI) ekspertlari O‘zbekistondagi ish beruvchilar orasida eng ko‘p talab qilinadigan ko’nikmalarni aniqlash bo‘yicha tadqiqot o‘tkazdi.
Buning uchun mavjud bo‘sh ish o‘rinlariga oid ma’lumotlar bazasi o‘rganib chiqildi.
Ushbu tadqiqotda PMTI mutaxassislari Head Hunter ma’lumotlar bazasidan foydalandi.
Mazkur ma’lumotlar bazasida O‘zbekistonning 12 mingga yaqin kompaniyasi va 370 mingga yaqin ish qidiruvchining rezyumelari ro‘yxatga olingan.
O‘rganish vaqtida ma’lumotlar bazasida 4 mingdan ortiq bo‘sh ish o‘rinlari qayd etildi.
Tahlil natijalariga ko‘ra, bo‘sh ish o‘rinlarining 28 foizida ijtimoiy ko‘nikmalar, ya’ni jamoada ishlash, muzokaralar olib borish, yaxshi nutq, muloqot, omma oldida taqdimot qilish qobiliyatlari talab etilishi ma’lum bo‘ldi.
Vakansiyalarning 18,3 foizida chet tillarini (asosan ingliz tilini) bilish talabi ko‘rsatilgan.
Ish beruvchilarning 15,2 foizi shaxsiy ko‘nikmalar, ya’ni mas’uliyat, stressga chidamlilik, ijodkorlik, motivatsiya, yetakchilik fazilatlarini talab etmoqda.
Bundan tashqari kompyuter savodxonligi ham eng ko‘p talab qilinuvchi ko‘nikma ekanligi ma’lum bo‘ldi — 12,5 foiz.
Bo‘sh ish o‘rinlarining 86 foizida ish qidiruvchilardan kamida bir yillik ish stajiga ega bo‘lish talab qilingan va ularning 11,3 foizida oliy ma’lumotli bo‘lish so‘ralgan.
Shuningdek, ekonometrik tahlil natijalariga ko‘ra, moliyaviy, kompyuterga ixtisoslashgan, kognitiv, mijozga yo‘naltirilgan, xodimlarni boshqarish, ijtimoiy ko‘nikmalar, rus, o‘zbek va ingliz tillarini bilish muhim ahamiyatga ega.
Ijobiy mukofot quyidagi ko‘nikmalarda namoyon bo‘ladi:
- moliyaviy — 34 foiz;
- hisoblash — 8,6 foiz;
- kognitiv — 20 foiz;
- mijozlarga yo‘naltirilgan — 21 foiz;
- xodimlarni boshqarish — 33 foiz;
- ingliz tilini bilish — 25 foiz.
Izoh (0)