Amerikaning Apple korporatsiyasi Rossiyadagi ofisidan xodimlarining katta qismini Qirg‘izistonga ko‘chirdi. Shuningdek, ba’zi xodimlar BAA va Buyuk Britaniyadagi ofislarga o‘tkazildi. Bu haqda “Vedomosti” o‘z manbalariga tayanib xabar bermoqda.
Ushbu jarayonga tayyorgarlik bahorda boshlanib, jarayonning o‘zi yozning oxirida tugagan.
Ukrainada jangovar harakatlar boshlanganidan keyin o‘z xodimlariga boshqa mamlakatlarga ko‘chib o‘tishni Google ham taklif qilgan. Kompaniya Dubayga relokatsiya qilishni taklif etgan, biroq iqlim va uzoq masofa tufayli ko‘pchilik xodimlar bosh tortgan.
Shu tariqa, ko‘pchilik xodimlar Qirg‘izistonga ko‘chirilgan — Apple’ning davlat organlari bilan aloqalar bo‘yicha joriy rahbari Nazim Turdumambetov asli shu mamlakatdan. Manbalar da’vo qilishicha, Qirg‘izistonga qo‘chishga tayyorgarlik bo‘yicha faol ishlar shu yilning bahoridayoq boshlangan.
Rasman Apple Rossiya bozoridan ketishi haqida e’lon qilmagan. Ukrainada maxsus operatsiya boshlanganidan keyin kompaniya o‘z qurilmalarining yangi modellari sotuvini to‘xtatib, Apple Pay va boshqa bir qator servislar ishini cheklagan.
Shuningdek, Apple AQSH sanksiyalari tufayli, o‘zining AppStore dasturlar do‘konidan ba’zi Rossiya kompaniyalari dasturlarini o‘chirib tashlagan.
Ekspertlar aytishicha, ko‘plab IT-kompaniyalar faol ravishda o‘z xodimlarini Qozog‘iston va O‘zbekistonga ko‘chirib o‘tkazmoqda, chunki bu mamlakatlar rus tilining keng tarqalgani va ko‘chib o‘tish narxi nuqtai nazarlaridan qulaydir. Shuningdek, Serbiya va Chernogoriyaga ko‘chib o‘tishlar ham ko‘p uchramoqda.
Izoh (0)