Xitoy olimlari dunyoda birinchi bo‘lib Arktika bo‘risi (Canis lupus arctos)ni klonlashtirdi, deb xabar bermoqda “RIA Novosti”. Bo‘ri bolasining dunyoga kelganini SinoGene biotexnologiya kompaniyasi bosh direktori Mi Szidun 20-sentabr kuni maxsus tashkil qilingan taqdimot chog‘ida e’lon qildi.
“Yuz kun avval dunyodagi birinchi klonlashtirilgan Arktika bo‘risi dunyoga keldi, bu muhim kunga guvoh bo‘lish uchun biz matbuot anjumanini tashkil qildik, va o‘ylaymanki, bu nafaqat SinoGene va Xarbin qutb parkining muvaffaqiyati, balki yovvoyi hayvonlarning qirilib borayotgan turlarini himoya qilish va ko‘paytirishga urnishimiz va ushbu sohadagi yangilik bo‘ldi”, — dedi tashkilot rahbari.
Nashr ma’lumotlariga ko‘ra, bo‘ri bolasi 2022-yil 10-iyun kuni Pekinning Chanpin tumanida joylashgan SinoGene laboratoriyasida dunyoga kelgan. Jonivorga surrogat ona sifatida bigl zotidagi it tanlangan. Somatik hujayralarni olimlar Maya laqabli urg‘ochi yovvoyi Arktika bo‘risining teri namunasidan olgan. U 2006-yilda Xitoyga Kanadadan keltirilgandi.
Mi Szidun qayd etishicha, klonlashtirish jarayoni hayvonlar uchun xavfsiz bo‘lib, ularning salomatligiga ta’sir o‘tkazmaydi. Klonlarning hayoti davomiyligi ham oddiy hayvonlarnikidan far qilmaydi. Kompaniya bosh direktori yaqin kunlarda yana bir klonlashtirilgan bo‘ri dunyoga kelishini ham ma’lum qildi.
Nashr eslatishicha, avvalroq janubiy koreyalik olimlar ikkita bigl zotli kuchuklarni klonlashtirgan, buning uchun genlarni tahrirlash yo‘li bilan o‘zgartirilgan teri hujayralaridan foydalanilgan edi.
Izoh (0)