Американинг Apple корпорацияси Россиядаги офисидан ходимларининг катта қисмини Қирғизистонга кўчирди. Шунингдек, баъзи ходимлар БАА ва Буюк Британиядаги офисларга ўтказилди. Бу ҳақда «Ведомости» ўз манбаларига таяниб хабар бермоқда.
Ушбу жараёнга тайёргарлик баҳорда бошланиб, жараённинг ўзи ёзнинг охирида тугаган.
Украинада жанговар ҳаракатлар бошланганидан кейин ўз ходимларига бошқа мамлакатларга кўчиб ўтишни Google ҳам таклиф қилган. Компания Дубайга релокация қилишни таклиф этган, бироқ иқлим ва узоқ масофа туфайли кўпчилик ходимлар бош тортган.
Шу тариқа, кўпчилик ходимлар Қирғизистонга кўчирилган — Apple’нинг давлат органлари билан алоқалар бўйича жорий раҳбари Назим Турдумамбетов асли шу мамлакатдан. Манбалар даъво қилишича, Қирғизистонга қўчишга тайёргарлик бўйича фаол ишлар шу йилнинг баҳоридаёқ бошланган.
Расман Apple Россия бозоридан кетиши ҳақида эълон қилмаган. Украинада махсус операция бошланганидан кейин компания ўз қурилмаларининг янги моделлари сотувини тўхтатиб, Apple Pay ва бошқа бир қатор сервислар ишини чеклаган.
Шунингдек, Apple АҚШ санкциялари туфайли, ўзининг AppStore дастурлар дўконидан баъзи Россия компаниялари дастурларини ўчириб ташлаган.
Экспертлар айтишича, кўплаб IT-компаниялар фаол равишда ўз ходимларини Қозоғистон ва Ўзбекистонга кўчириб ўтказмоқда, чунки бу мамлакатлар рус тилининг кенг тарқалгани ва кўчиб ўтиш нархи нуқтаи назарларидан қулайдир. Шунингдек, Сербия ва Черногорияга кўчиб ўтишлар ҳам кўп учрамоқда.
Изоҳ (0)