Germaniya kansleri Olaf Shols inqiroz davrida iqtisodiyotni 200 milliard yevrolik qo‘llab-quvvatlash rejasini taqdim etdi. Mablag‘lar mamlakatda elektr energiyasi va gaz narxini muzlatish uchun yo‘naltiriladi.
Hozirda hukumat tomonidan bu borada aniq chora-tadbirlar rejasi ishlab chiqilmoqda va bu qarorning tafsilotlari bir oy muddatda taqdim etiladi.
Elektr energiyasi narxlarini muzlatish uy xo‘jaliklari, shuningdek, kichik va o‘rta biznesning asosiy iste’mol hajmini subsidiyalash shaklida rasmiylashtiriladi.
Qo‘shimcha iste’mol hajmlari xaridorlar tomonidan bozor narxlarida to‘lanadi. Iste’molning asosiy hajmi qanday bo‘lishi haqida hukumat hali aniqlik kiritgani yo‘q.
Bundan tashqari, hukumat 2024-yil bahorigacha gaz sotishdan olinadigan qo‘shilgan qiymat solig‘ini 19 foizdan 7 foizgacha pasaytiradi.
Sholsning ta’kidlashicha, Germaniya “Shimoliy oqim” va “Shimoliy oqim 2” gaz quvurlaridagi portlashlardan keyin yaqin kelajakda Rossiya gazini yetkazib berish qayta tiklanishini kutmaydi.
Shu bilan birga, Germaniya boshqa mamlakatlardan gaz import qilish, suyultirilgan gaz terminallarini qurish, rezervuarlarni 90 foizdan ko‘prog‘iga to‘ldirish, ko‘mir bilan ishlaydigan elektr stansiyalarini qayta ishga tushirish va zarurat tug‘ilganda Germaniyaning janubidagi atom elektr stansiyalaridan foydalanishga tayyor, — deyiladi hisobotda.
Sentabr oyi boshida Germaniya hukumati mamlakatda inflyatsiya darajasini pasaytirish bo‘yicha 65 milliard yevrolik chora-tadbirlar paketini taqdim etgan edi.
Germaniya Federal Statistika boshqarmasi prognozini taqdim etdi. Unga ko‘ra, sentabr oyi oxirigacha iste’mol narxlari indeksi yillik ko‘rsatkichlarda rekord darajada 10 foizga o‘sadi.
Izoh (0)