“Tolibon” Rossiya bilan Afg‘onistonga benzin, dizel yoqilg‘isi, gaz va bug‘doy yetkazib berish bo‘yicha dastlabki kelishuvni imzoladi. Bu haqda mamlakat sanoat va savdo vaziri vazifasini bajaruvchi Hoji Nuriddin Aziziyga tayanib, Reuters xabar bermoqda.
Aziziyning so‘zlariga ko‘ra, uning hukumati import ta’minotini diversifikatsiya qilish bo‘yicha faol ishlamoqda. Shuningdek, Rossiya “Tolibon” ma’muriyatiga xomashyoga chegirma taklif qilgan.
Rasmiyning ta’kidlashicha, Rossiya kelishuv doirasida Afg‘onistonga bir million tonnaga yaqin benzin, bir million tonna dizel yoqilg‘isi, 500 ming tonna suyultirilgan gaz va ikki million tonna bug‘doy yetkazib beradi.
Reuters agentligining qayd etishicha, bu kelishuv Tolibon 2021-yil avgustida hokimiyatni qo‘lga kiritganidan keyin tuzgan birinchi yirik xalqaro iqtisodiy bitim bo‘ldi.
BMT Bosh kotibining gumanitar masalalar bo‘yicha o‘rinbosari va favqulodda yordam koordinatori Martin Griffits Afg‘onistonga donor davlatlardan zudlik bilan moliyalashtirish zarurligini, chunki mamlakatda davom etayotgan iqtisodiy inqiroz tufayli 6 million afg‘on tez orada ocharchilikka duch kelishi mumkinligini aytgan edi.
Griffitsning hisob-kitoblariga ko‘ra, aholi kelayotgan qishdan omon qolishi uchun mamlakat zudlik bilan 770 million dollar ajratishi kerak.
Avvalroq Afg‘oniston Rossiya neft mahsulotlarini mayiz va dorivor o‘simliklarga ayirboshlamoqchiligi haqida xabar berilgandi.
Izoh (0)