Германия канцлери Олаф Шольц инқироз даврида иқтисодиётни 200 миллиард евролик қўллаб-қувватлаш режасини тақдим этди. Маблағлар мамлакатда электр энергияси ва газ нархини музлатиш учун йўналтирилади.
Ҳозирда ҳукумат томонидан бу борада аниқ чора-тадбирлар режаси ишлаб чиқилмоқда ва бу қарорнинг тафсилотлари бир ой муддатда тақдим этилади.
Электр энергияси нархларини музлатиш уй хўжаликлари, шунингдек, кичик ва ўрта бизнеснинг асосий истеъмол ҳажмини субсидиялаш шаклида расмийлаштирилади.
Қўшимча истеъмол ҳажмлари харидорлар томонидан бозор нархларида тўланади. Истеъмолнинг асосий ҳажми қандай бўлиши ҳақида ҳукумат ҳали аниқлик киритгани йўқ.
Бундан ташқари, ҳукумат 2024 йил баҳоригача газ сотишдан олинадиган қўшилган қиймат солиғини 19 фоиздан 7 фоизгача пасайтиради.
Шольцнинг таъкидлашича, Германия «Шимолий оқим» ва «Шимолий оқим 2» газ қувурларидаги портлашлардан кейин яқин келажакда Россия газини етказиб бериш қайта тикланишини кутмайди.
Шу билан бирга, Германия бошқа мамлакатлардан газ импорт қилиш, суюлтирилган газ терминалларини қуриш, резервуарларни 90 фоиздан кўпроғига тўлдириш, кўмир билан ишлайдиган электр станцияларини қайта ишга тушириш ва зарурат туғилганда Германиянинг жанубидаги атом электр станцияларидан фойдаланишга тайёр, — дейилади ҳисоботда.
Сентябрь ойи бошида Германия ҳукумати мамлакатда инфляция даражасини пасайтириш бўйича 65 миллиард евролик чора-тадбирлар пакетини тақдим этган эди.
Германия Федерал Статистика бошқармаси прогнозини тақдим этди. Унга кўра, сентябрь ойи охиригача истеъмол нархлари индекси йиллик кўрсаткичларда рекорд даражада 10 фоизга ўсади.
Изоҳ (0)