Afg‘oniston Rossiya neft mahsulotlarini mayiz va dorivor o‘simliklarga ayirboshlamoqchi

Afg‘oniston neft mahsulotlari va tovarlarni barter sxemasi orqali sotib olish imkoniyatini ko‘rib chiqmoqda. Buning evaziga mamlakat Rossiyaga minerallar, mayiz va dori-darmonlar uchun xomashyo eksport qilishga rozi. Bu haqda “Kommersant” xabar berdi.

Bizning ustuvor vazifamiz bu Rossiya tovarlarini barter asosida import qilishdir. Agar ushbu sxema bo‘yicha operatsiyalar muvaffaqiyatsiz bo‘lsa, biz moliyaviy operatsiyalardan foydalanishimiz mumkin. Bu masalada hech qanday muammo yo‘q, — dedi Afg‘oniston sanoat va savdo vazirligi rahbari Nuriddin Aziziy.

Uning ta’kidlashicha, AQSH yoki Yevropa Ittifoqi tomonidan bunday xom ashyo yetkazib berishda hech qanday cheklovlar yo‘q, Afg‘oniston bu tovarlar uchun pul bilan to‘lashi mumkin.

Nuriddin Aziziyga ko‘ra, mamlakat 2022-yil oxirigacha 1 mln tonnaga yaqin benzin va 1 mln tonna dizel yoqilg‘isi yetkazib berish bo‘yicha Rossiya bilan kelishuvga erishmoqchi.

Rossiya neft mahsulotlari evaziga Afg‘oniston foydali qazilmalarni taklif qilishi mumkin.

Bundan tashqari, bizda quritilgan mevalar, mayiz va dorivor o‘tlar bor, Afg‘oniston tarixan Rossiyaga katta hajmdagi mayiz yetkazib bergan. Dorivor o‘tlarning narxi hozir juda yuqori va Rossiya dori uchun bunday xom ashyoga muhtoj. Biz esa ulardan barter savdosida foydalanishimiz mumkin, — dedi u.

Afg‘oniston Sanoat va savdo vazirligi delegatsiyasi 14-avgustdan buyon Rossiyada bo‘lib turibdi.