Россия Афғонистонга нефть, газ ва буғдой сотади — Reuters

«Толибон» Россия билан Афғонистонга бензин, дизель ёқилғиси, газ ва буғдой етказиб бериш бўйича дастлабки келишувни имзолади. Бу ҳақда мамлакат саноат ва савдо вазири вазифасини бажарувчи Ҳожи Нуриддин Азизийга таяниб, Reuters хабар бермоқда.

Азизийнинг сўзларига кўра, унинг ҳукумати импорт таъминотини диверсификация қилиш бўйича фаол ишламоқда. Шунингдек, Россия «Толибон» маъмуриятига хом ашёга чегирма таклиф қилган.

Расмийнинг таъкидлашича, Россия келишув доирасида Афғонистонга бир миллион тоннага яқин бензин, бир миллион тонна дизель ёқилғиси, 500 минг тонна суюлтирилган газ ва икки миллион тонна буғдой етказиб беради.

Reuters агентлигининг қайд этишича, бу келишув Толибон 2021 йил августида ҳокимиятни қўлга киритганидан кейин тузган биринчи йирик халқаро иқтисодий битим бўлди.

БМТ Бош котибининг гуманитар масалалар бўйича ўринбосари ва фавқулодда ёрдам координатори Мартин Гриффиц Афғонистонга донор давлатлардан зудлик билан молиялаштириш зарурлигини, чунки мамлакатда давом этаётган иқтисодий инқироз туфайли 6 миллион афғон тез орада очарчиликка дуч келиши мумкинлигини айтган эди.

Гриффицнинг ҳисоб-китобларига кўра, аҳоли келаётган қишдан омон қолиши учун мамлакат зудлик билан 770 миллион доллар ажратиши керак.

Аввалроқ Афғонистон Россия нефть маҳсулотларини майиз ва доривор ўсимликларга айирбошламоқчилиги ҳақида хабар берилганди.