22-sentabr kuni Yaponiyaning Tokio shahridagi xalqaro ko‘rgazma markazida JATA Tourism Expo Japan-2022 xalqaro ko‘rgazmasi o‘z ishini boshladi. Bu haqda Turizm va madaniy meros vazirligi xabar qildi.
Qayd etilishicha, O‘zbekiston delegatsiyasi Turizm va madaniy meros vazirligi, mamlakatning Yaponiyadagi elchixonasi, Yaponiyaning JICA xalqaro hamkorlik agentligi hamda Markaziy Osiyo davlatlari turistik administratsiyalari bilan hamkorlikda yaratilgan yagona stendda ishtirok etmoqda.
“Qayd etish lozimki, O‘zbekiston va Yaponiya turizm sohasida ulkan salohiyatga ega. Yaponiyaliklarning O‘zbekistonga sayohati tarixi uzoq asrlarga borib taqaladi, zero bu mamlakatning savdo-iqtisodiy hamda madaniy-gumanitar aloqalari Buyuk Ipak yo‘li orqali rivojlangan”, — degan O‘zbekiston stendini ochib bergan turizm vaziri Aziz Abduhakimov.
O‘zbekiston stendi ochilishida, shuningdek, Yaponiya turizm agentligi raisi Koichi Vada ham ishtirok etib, so‘zga chiqqan va barchaga muvaffaqiyat tilagan. Shundan so‘ng O‘zbekiston Respublikasining madaniyat sohasi vakillari tomonidan o‘zbek milliy san’ati namunalari ijro etilgan.
Ta’kidlanishicha, JATA Tourism Expo Japan-2022 xalqaro ko‘rgazmasida o‘zbekistonlik turoperatorlar ham ishtirok etib, yaponiyalik turoperatorlar va boshqa mamlakatlardan tashrif buyurgan hamkasblari bilan B2B uchrashuvlarda qatnashmoqda.
Izoh (0)