“Joriy mavsumda terimchilar 100 mlrd so‘m daromad olishi kutilyapti” — Mirishkor tumani hokimi

Qashqadaryo viloyatining Mirishkor tumani hokimi Sherali Sanayev joriy mavsumda tumandagi paxta dalalarida mehnat qilgan terimchilar uchun 100 milliard so‘m terim puli ajratilganini ma’lum qildi. Bu haqda “Daryo”ga tuman hokimligi axborot xizmati rahbari Azizbek Yazdurdiyev xabar berdi.

Ma’lum bo‘lishicha, Mirishkor tumanida joriy paxta mavsumida 1036 ta fermer xo‘jaligi 19,1 ming gektar yer maydoniga chigit ekkan bo‘lib, 7-sentabrdan boshlab yig‘im-terim ishlarini boshlagan.

Aytilishicha, yetishtirilgan paxta hosilini nest-nobud qilmasdan, qisqa muddatlarda sifatli qilib terib olish, terimga fermer xo‘jaligi a’zolari va uyushmagan aholini ko‘ngilli tarzda jalb etish bo‘yicha barcha zaruriy choralar ko‘rilgan bo‘lib, terim ishlari jadal davom etmoqda.

E’tiborga molik yana bir jihati shundaki, tuman hokimi Sherali Sanayev tashabbusi va hududda mavjud paxtachilik klasterlari hamkorligida mavsum boshidan yuqori natija qayd etib, shartnomaviy rejalarini birinchilar qatorida bajarayotgan fermer xo‘jaliklari raislariga qimmatbaho sovg‘alar berilmoqda. Xususan, tumandagi “To‘lqin Berdiyev”, “Zafar zar tuprog‘i”, “Shoymardonov Davron”, “Toshev Ro‘zimurod”, “Sharapov Alisherxon” va boshqa bir qator fermer xo‘jaliklari yuqori hosildorlik olib, birinchilar qatorida shartnomaviy rejalarini bajarishdi”, — deydi Azizbek Yazdurdiyev.

Aytilishicha, mavsum boshidan 245 nafar otryad rahbari, 45 nafar mahalla raisi, 47 nafar o‘z ko‘magini ayamayotgan FVB xodimi va 16 nafar MMTP raisi ana shunday qimmatbaho sovg‘alarga ega chiqqan.

Tuman hokimi Sherali Sanayevning ma’lumot berishicha, joriy mavsumda Mirishkordagi paxta yig‘im-terimiga 15 ming uyushmagan aholi ko‘ngilli tarzda jalb etilgan bo‘lib, ularning terimi uchun 100 milliard so‘m mablag‘ sarflanishi rejalashtirilgan.

Terimni yaxshi kayfiyatda boshlab oldik. Kuniga 150-200 kilodan paxta teraman. Har mavsumda 10-15 million so‘mdan ortiq qo‘shimcha daromad olaman. Bundan tashqari rag‘batlantirishadi, un, yog‘ berishadi. Terim pullarini dalaga naqd shaklda olib kelib berishadi. Nasib qilsa bu mavsum ham faol bo‘lamiz”, — deydi faol terimchilardan biri Farog‘at Alimova.