O‘zbekistonda o‘tgan bir yilda malaka toifasiga ega bo‘lgan o‘qituvchilar soni qariyb 303 ming nafarga yetib, bu jami pedagoglarning 62,5 foizini tashkil etmoqda. Bu haqda Xalq ta’limi vazirligi axborot xizmati xabar berdi.
Ta’kidlanishicha, 2021-yilda bu ko‘rsatkich 45,2 foizni tashkil qilgan bo‘lsa, uch yil oldin 30 foizga ham yetmagan. Shuningdek, 2022-yilda oliy va birinchi malaka toifasiga ega o‘qituvchilar soni salkam 143 ming nafarga, ya’ni 30,1 foizga yetgani holda oliy malaka toifasiga ega o‘qituvchilar ulushi 9,1 foizni tashkil etmoqda. 2021-yilda bu ko‘rsatkich 5,7 foiz bo‘lgan.
O‘z navbatida, xalq ta’limi tizimida faoliyat yuritayotgan o‘rta ma’lumotli o‘qituvchilar ulushi ham 9,5 foizdan 7,3 foizga kamaygan.
Bu ham maktablarda oliy ma’lumotli o‘qituvchilar safi yildan yilga kengayib, pedagog kasbining nufuzi oshib borayotganiga dalildir. 2021-yildan xorijiy tillar o‘qituvchilariga xalqaro sertifikat berish tizimi joriy qilinib, ularning o‘z bilimini isbotlashi asosida shaffof tarzda oylik maoshini qo‘shimcha oshirish imkoni berildi. Bu esa o‘tgan qisqa davrda xalqaro standartlarga javob beradigan chet til o‘qituvchilari soni deyarli uch barobar oshishiga turtki bo‘ldi.
Izoh (0)