22 сентябрь куни Япониянинг Токио шаҳридаги халқаро кўргазма марказида JATA Tourism Expo Japan-2022 халқаро кўргазмаси ўз ишини бошлади. Бу ҳақда Туризм ва маданий мерос вазирлиги хабар қилди.
Қайд этилишича, Ўзбекистон делегацияси Туризм ва маданий мерос вазирлиги, мамлакатнинг Япониядаги элчихонаси, Япониянинг JICA халқаро ҳамкорлик агентлиги ҳамда Марказий Осиё давлатлари туристик администрациялари билан ҳамкорликда яратилган ягона стендда иштирок этмоқда.
«Қайд этиш лозимки, Ўзбекистон ва Япония туризм соҳасида улкан салоҳиятга эга. Японияликларнинг Ўзбекистонга саёҳати тарихи узоқ асрларга бориб тақалади, зеро бу мамлакатнинг савдо-иқтисодий ҳамда маданий-гуманитар алоқалари Буюк Ипак йўли орқали ривожланган», — деган Ўзбекистон стендини очиб берган туризм вазири Азиз Абдуҳакимов.
Ўзбекистон стенди очилишида, шунингдек, Япония туризм агентлиги раиси Коичи Вада ҳам иштирок этиб, сўзга чиққан ва барчага муваффақият тилаган. Шундан сўнг Ўзбекистон Республикасининг маданият соҳаси вакиллари томонидан ўзбек миллий санъати намуналари ижро этилган.
Таъкидланишича, JATA Tourism Expo Japan-2022 халқаро кўргазмасида ўзбекистонлик туроператорлар ҳам иштирок этиб, япониялик туроператорлар ва бошқа мамлакатлардан ташриф буюрган ҳамкасблари билан B2B учрашувларда қатнашмоқда.
Изоҳ (0)