23-sentabr kuni Sportni rivojlantirish vazirligida O‘zbekiston karate WKF federatsiyasining navbatdagi hisobot-saylov konferensiyasi bo‘lib o‘tdi. Bu haqda Milliy olimpiya qo‘mitasi xabar qildi.
Qayd etilishicha, konferensiya kun tartibidan federatsiyaga yangi rais saylash, uning rahbariyati va Ijroiya qo‘mitasi tarkibini qaytadan shakllantirib olish kabi masalalar o‘rin olgan.
Konferensiya kun tartibidan o‘rin olgan masalalar bir ovozdan tasdiqlangach, asosiy jarayonga o‘tilgan. Unda Vazirlar Mahkamasining Ta’lim, sog‘liqni saqlash va sport masalalari kotibiyati mas’ul xodimi, bungacha sport sohasida turli lavozimlarda faoliyat olib borgan Rashid Tolipov nomzodi federatsiya raisi lavozimiga taklif etilgan va konferensiya ishtirokchilari tomonidan bir ovozdan ma’qullangan.
Shu tariqa Rashid Tolipov O‘zbekiston karate WKF federatsiyasi raisi etib saylangan. Shu paytgacha federatsiya rahbari sifatida faoliyat olib borgan Alam Mullayev, shuningdek, Baxtiyor Nigmatullayev, Anvar Muhamedov, Saparmurod Djiyemurotov, Ilhom Mamadaliyev, Burxon Rahmonov hamda Dilnoza Bakirova rais o‘rinbosari, bungacha federatsiya Ijrochi direktori lavozimida ishlagan Farruh Toshkentboyev federatsiya bosh kotibi etib saylangan. Shuningdek, tadbir davomida Ijroiya qo‘mitasi a’zolari ham shakllantirilib, tashkilotning yangi tahrirdagi nizomi tasdiqlangan.
Izoh (0)