23 сентябрь куни Спортни ривожлантириш вазирлигида Ўзбекистон каратэ WKF федерациясининг навбатдаги ҳисобот-сайлов конференцияси бўлиб ўтди. Бу ҳақда Миллий олимпия қўмитаси хабар қилди.
Қайд этилишича, конференция кун тартибидан федерацияга янги раис сайлаш, унинг раҳбарияти ва Ижроия қўмитаси таркибини қайтадан шакллантириб олиш каби масалалар ўрин олган.
Конференция кун тартибидан ўрин олган масалалар бир овоздан тасдиқлангач, асосий жараёнга ўтилган. Унда Вазирлар Маҳкамасининг Таълим, соғлиқни сақлаш ва спорт масалалари котибияти масъул ходими, бунгача спорт соҳасида турли лавозимларда фаолият олиб борган Рашид Толипов номзоди федерация раиси лавозимига таклиф этилган ва конференция иштирокчилари томонидан бир овоздан маъқулланган.
Шу тариқа Рашид Толипов Ўзбекистон каратэ WKF федерацияси раиси этиб сайланган. Шу пайтгача федерация раҳбари сифатида фаолият олиб борган Алам Муллаев, шунингдек, Бахтиёр Нигматуллаев, Анвар Муҳамедов, Сапармурод Джиемуротов, Илҳом Мамадалиев, Бурхон Раҳмонов ҳамда Дилноза Бакирова раис ўринбосари, бунгача федерация Ижрочи директори лавозимида ишлаган Фарруҳ Тошкентбоев федерация бош котиби этиб сайланган. Шунингдек, тадбир давомида Ижроия қўмитаси аъзолари ҳам шакллантирилиб, ташкилотнинг янги таҳрирдаги низоми тасдиқланган.
Изоҳ (0)