Uy-joy kommunal xizmat ko‘rsatish vazirligi huzuridagi Uy-joy fondi inspeksiyasi Toshkent shahri Olmazor tumani Sag‘bon 30-berk ko‘chasida joylashgan ko‘p qavatli uylarning tom qismiga qo‘shimcha qavat qurilayotgani aytilayotgan holat yuzasidan ma’lumot berdi.
Aniqlanishicha, ushbu ko‘p kvartirali turar joy binosi “Baurum Group” MCHJ tomonidan 2017-yilda qurilgan va foydalanishga topshirilgan. 2017-yil 6-iyunda “Qorasaroy elit kommunal” UJMSH bilan tuzilgan shartnomaga ko‘ra, uylarning tom va yerto‘la qismlari umumiy mulk sifatida topshirilmagan.
Qayta rejalashtirish ishlari Olmazor tumani qurilish bo‘limining “Yakka tartibdagi uy-joyning loyiha-smeta hujjatlarini kelishilganligi haqida” 2021-yil 24-iyundagi xulosasiga asosan amalga oshirilmoqda. Bu esa Shaharsozlik normalari va qoidalari talablari buzilganini anglatadi.
Mazkur holat yuzasidan xulosa beruvchi tashkilot o‘rganish ishlarini amalga oshirishi maqsadga muvofiq ekani bildirilgan.
Ma’lumot uchun, Uy-joy kodeksining 124-moddasiga ko‘ra ko‘p kvartirali uydagi turar va yashash uchun mo‘ljallanmagan joylar mulkdorlariga shu uyning umumiy joylarini, tayanch va to‘siq konstruksiyalar, kvartiralar oralig‘idagi ihotalangan (o‘ralma) pillapoyalar, zinapoyalar, liftlar, liftning shaxtalari va boshqa shaxtalar, dahlizlar, texnik qavatlar, yerto‘lalar, cherdaklar va tomlar, uy ichidagi muhandislik tarmoqlari va kommunikatsiyalari, joylar tashqarisida yoki ichida joylashgan va bittadan ortiq joyga xizmat ko‘rsatadigan mexanik, elektr, sanitariya-texnika uskunalari va qurilmalari hamda boshqa uskunalar va qurilmalarni o‘z ichiga olgan umumiy mol-mulk ulushli mulk huquqi asosida tegishli bo‘ladi.
Izoh (0)