Уй-жой коммунал хизмат кўрсатиш вазирлиги ҳузуридаги Уй-жой фонди инспекцияси Тошкент шаҳри Олмазор тумани Сағбон 30-берк кўчасида жойлашган кўп қаватли уйларнинг том қисмига қўшимча қават қурилаётгани айтилаётган ҳолат юзасидан маълумот берди.
Аниқланишича, ушбу кўп квартирали турар жой биноси «Баурум Group» МЧЖ томонидан 2017 йилда қурилган ва фойдаланишга топширилган. 2017 йил 6 июнда «Қорасарой элите коммунал» УЖМШ билан тузилган шартномага кўра, уйларнинг том ва ертўла қисмлари умумий мулк сифатида топширилмаган.
Қайта режалаштириш ишлари Олмазор тумани қурилиш бўлимининг «Якка тартибдаги уй-жойнинг лойиҳа-смета ҳужжатларини келишилганлиги ҳақида» 2021 йил 24 июндаги хулосасига асосан амалга оширилмоқда. Бу эса Шаҳарсозлик нормалари ва қоидалари талаблари бузилганини англатади.
Мазкур ҳолат юзасидан хулоса берувчи ташкилот ўрганиш ишларини амалга ошириши мақсадга мувофиқ экани билдирилган.
Маълумот учун, Уй-жой кодексининг 124-моддасига кўра кўп квартирали уйдаги турар ва яшаш учун мўлжалланмаган жойлар мулкдорларига шу уйнинг умумий жойларини, таянч ва тўсиқ конструкциялар, квартиралар оралиғидаги иҳоталанган (ўралма) пиллапоялар, зинапоялар, лифтлар, лифтнинг шахталари ва бошқа шахталар, даҳлизлар, техник қаватлар, ертўлалар, чердаклар ва томлар, уй ичидаги муҳандислик тармоқлари ва коммуникациялари, жойлар ташқарисида ёки ичида жойлашган ва биттадан ортиқ жойга хизмат кўрсатадиган механик, электр, санитария-техника ускуналари ва қурилмалари ҳамда бошқа ускуналар ва қурилмаларни ўз ичига олган умумий мол-мулк улушли мулк ҳуқуқи асосида тегишли бўлади.
Изоҳ (0)