O‘zbekiston 2022-yilning yanvar—avgust oylarida xorijga qiymati 33,2 mln dollarga teng bo‘lgan 119,8 ming tonna qovun va tarvuz eksport qilgan. Bu haqda Davlat statistika qo‘mitasi xabar bermoqda.
Qovun va tarvuz eksporti hajmi 2021-yilning mos davriga nisbatan solishtirilganda 50,1 ming tonna (71,8 foiz)ga ko‘paygan.
O‘tgan yilning ilk sakkiz oyida O‘zbekiston xorijga qiymati 19,3 mln dollarga teng bo‘lgan 69,7 ming tonna qovun va tarvuz eksport qilgan edi. Bir yil ichida ushbu mahsulotlar eksportidan daromad 13,9 mln dollarga oshgan.
O‘zbekiston 2022-yilning 8 oyida eng ko‘p qovun va tarvuz eksport qilgan davlatlar orasida Qozog‘iston yetakchilik qilmoqda — 53,6 ming tonna. 2021-yilning mos davrida bu ko‘rsatkich 29,2 ming tonnaga teng bo‘lgan edi.
O‘zbekistondan qovun va tarvuz sotib olish bo‘yicha Rossiya (26,9 ming tonna) ikkinchi, Qirg‘iziston (19,9 ming tonna) uchinchi bo‘lgan. Bu davlat o‘tgan yili ham xuddi shu o‘rinlarni egallagan edi.
Shuningdek, o‘tgan yili 4,3 ming tonna qovun va tarvuz sotib olish bilan to‘rtinchi o‘rinda bo‘lgan Ukraina bu yil yetakchi davtlar qatoridan chiqib ketgan.
Bundan tashqari bir qancha Yevropa davlatlari ham o‘zbek qovun va tarvuzlarini sotib olmoqda.
Avvalroq O‘zbekistonda 2022-yilda 1 mln tonnadan oshiq qovun yetishtirish rejalashtirilgani haqida xabar berilgan edi.
Izoh (0)