Ўзбекистон 2022 йилнинг январь—август ойларида хорижга қиймати 33,2 млн долларга тенг бўлган 119,8 минг тонна қовун ва тарвуз экспорт қилган. Бу ҳақда Давлат статистика қўмитаси хабар бермоқда.
Қовун ва тарвуз экспорти ҳажми 2021 йилнинг мос даврига нисбатан солиштирилганда 50,1 минг тонна (71,8 фоиз)га кўпайган.
Ўтган йилнинг илк саккиз ойида Ўзбекистон хорижга қиймати 19,3 млн долларга тенг бўлган 69,7 минг тонна қовун ва тарвуз экспорт қилган эди. Бир йил ичида ушбу маҳсулотлар экспортидан даромад 13,9 млн долларга ошган.
Ўзбекистон 2022 йилнинг 8 ойида энг кўп қовун ва тарвуз экспорт қилган давлатлар орасида Қозоғистон етакчилик қилмоқда — 53,6 минг тонна. 2021 йилнинг мос даврида бу кўрсаткич 29,2 минг тоннага тенг бўлган эди.
Ўзбекистондан қовун ва тарвуз сотиб олиш бўйича Россия (26,9 минг тонна) иккинчи, Қирғизистон (19,9 минг тонна) учинчи бўлган. Бу давлат ўтган йили ҳам худди шу ўринларни эгаллаган эди.
Шунингдек, ўтган йили 4,3 минг тонна қовун ва тарвуз сотиб олиш билан тўртинчи ўринда бўлган Украина бу йил етакчи давтлар қаторидан чиқиб кетган.
Бундан ташқари бир қанча Европа давлатлари ҳам ўзбек қовун ва тарвузларини сотиб олмоқда.
Аввалроқ Ўзбекистонда 2022 йилда 1 млн тоннадан ошиқ қовун етиштириш режалаштирилгани ҳақида хабар берилган эди.
Изоҳ (0)