AQSHning sanksiyalar siyosatiga bog‘lagan umidlari puchga chiqadi, u Vashington tomonidan shunday cheklov choralariga uchragan davlatlarni o‘zaro yaqinlashtiradi, xolos. Bu haqda CBS telekanaliga bergan intervyusida Eron prezidenti Ibrohim Raisiy aytib o‘tdi, deb yozadi “RBK”.
“Sanksiyalar bir qator mamlakatlarga nisbatan kiritilgan. Shunday yo‘l tutish orqali, ular davlatlarni yaqinlashtirmoqda, ularning hamjihatligini mustahkamlamoqda. Shuning ortida Amerika sanksiyalari samarasiz bo‘lib chiqadi”, — dedi Raisiy.
Uning so‘zlariga ko‘ra, Vashingtonning ushbu yondashuvi muvaffaqiyatsizlikka uchrashi aniq.
AQSHning Eronga qarshi sanksiyalari mamlakatda Islom inqilobi yuz bergan 1979-yildan buyon amal qilib keladi. Mamlakat uzoq yillar davomida o‘ziga qarshi kiritilgan sanksiyalar soni bo‘yicha dunyoda yetakchi bo‘lib kelayotgandi, biroq Rossiya Ukrainada maxsus operatsiya boshlaganidan keyin Moskva sanksiyalar soni bo‘yicha Tehronni ortda qoldirdi. Bloomberg ma’lumotlariga ko‘ra, fevral oxiridan buyon Rossiyaga nisbatan joriy qilingan sanksiyalar soni shu paytgacha Eronga nisbatan amal qilib kelgan sanksiyalardan oshib ketgan.
Sanksiyalarning kelajagi yo‘qligi haqida Rossiya prezidenti Vladimir Putin ham bir necha marta gapirib o‘tgan. Sentabr o‘rtalarida u tashqi cheklovlar fonida Rossiya-Eron aloqalari barcha sohalarda rivojlanayotgani, hamkorlik esa tez orada yangi bosqichga chiqishini aytgandi.
Prezidentning so‘zlariga ko‘ra, ikki mamlakat o‘rtasidagi tovar aylanmasi 2021-yilda 81 foizga, shu yil esa (yanvardan maygacha) 30 foizga o‘sgan. Bundan tashqari, Eron va Rossiyaning ko‘plab xalqaro masalalar bo‘yicha pozitsiyalari bir-biriga “mos keladi”.
Avgust oxirida The Washington Post Eron Rossiyaga Ukrainaga qarshi urushda foydalanish uchun zarbdor uchuvchisiz uchar qurilmalarning birinchi partiyasini yetkazganini ma’lum qilgandi. Ilk sinovlar chog‘ida Eron dronlari bir necha marta ishdan chiqqan. Sentabrda The New York Times gazetasi, AQSH razvedkasiga tayanib, Rossiya KXDRdan millionlab artilleriya snaryadlari hamda kichik va o‘rta masofali raketalar sotib olayotgani haqida xabar berdi.
Avvalroq Rossiya G‘arb sanksiyalariga qarshi turish maqsadida Eron bilan savdo va harbiy aloqalarni kengaytirib, mustahkamlayotgani xabar berilgandi. Shuningdek, Rossiya va Eron sayyohlik guruhlari uchun vizalarni bekor qildi.
Izoh (0)