АҚШнинг санкциялар сиёсатига боғлаган умидлари пучга чиқади, у Вашингтон томонидан шундай чеклов чораларига учраган давлатларни ўзаро яқинлаштиради, холос. Бу ҳақда CBS телеканалига берган интервьюсида Эрон президенти Иброҳим Раисий айтиб ўтди, деб ёзади «РБК».
«Санкциялар бир қатор мамлакатларга нисбатан киритилган. Шундай йўл тутиш орқали, улар давлатларни яқинлаштирмоқда, уларнинг ҳамжиҳатлигини мустаҳкамламоқда. Шунинг ортида Америка санкциялари самарасиз бўлиб чиқади», — деди Раисий.
Унинг сўзларига кўра, Вашингтоннинг ушбу ёндашуви муваффақиятсизликка учраши аниқ.
АҚШнинг Эронга қарши санкциялари мамлакатда Ислом инқилоби юз берган 1979 йилдан буён амал қилиб келади. Мамлакат узоқ йиллар давомида ўзига қарши киритилган санкциялар сони бўйича дунёда етакчи бўлиб келаётганди, бироқ Россия Украинада махсус операция бошлаганидан кейин Москва санкциялар сони бўйича Теҳронни ортда қолдирди. Bloomberg маълумотларига кўра, февраль охиридан буён Россияга нисбатан жорий қилинган санкциялар сони шу пайтгача Эронга нисбатан амал қилиб келган санкциялардан ошиб кетган.
Санкцияларнинг келажаги йўқлиги ҳақида Россия президенти Владимир Путин ҳам бир неча марта гапириб ўтган. Сентябрь ўрталарида у ташқи чекловлар фонида Россия-Эрон алоқалари барча соҳаларда ривожланаётгани, ҳамкорлик эса тез орада янги босқичга чиқишини айтганди.
Президентнинг сўзларига кўра, икки мамлакат ўртасидаги товар айланмаси 2021 йилда 81 фоизга, шу йил эса (январдан майгача) 30 фоизга ўсган. Бундан ташқари, Эрон ва Россиянинг кўплаб халқаро масалалар бўйича позициялари бир-бирига «мос келади».
Август охирида The Washington Post Эрон Россияга Украинага қарши урушда фойдаланиш учун зарбдор учувчисиз учар қурилмаларнинг биринчи партиясини етказганини маълум қилганди. Илк синовлар чоғида Эрон дронлари бир неча марта ишдан чиққан. Сентябрда The New York Times газетаси, АҚШ разведкасига таяниб, Россия КХДРдан миллионлаб артиллерия снарядлари ҳамда кичик ва ўрта масофали ракеталар сотиб олаётгани ҳақида хабар берди.
Аввалроқ Россия Ғарб санкцияларига қарши туриш мақсадида Эрон билан савдо ва ҳарбий алоқаларни кенгайтириб, мустаҳкамлаётгани хабар берилганди. Шунингдек, Россия ва Эрон сайёҳлик гуруҳлари учун визаларни бекор қилди.
Изоҳ (0)