AQSH Rossiyaga dronlar yetkazib bergan Eron kompaniyalariga qarshi sanksiyalar kiritdi

AQSH Moliya vazirligi Tehrondagi Safiran Airport Services kompaniyasiga nisbatan sanksiyalar kiritganini e’lon qildi, u, Amerika hukumati da’vo qilishicha, Eron uchuvchisiz uchar qurilmalarining Rossiyaga yetkazib berilishiga aloqador, deb yozadi Meduza.

AQSH ma’lumotlariga ko‘ra, Safiran kompaniyasi “Eron va Rossiya o‘rtasida Rossiya harbiy reyslarini muvofiqlashtirgan”, ular, shu jumladan, Eron dronlari, tegishli qurilmalar va xodimlarni tashish bilan bog‘liq bo‘lgan. AQSHda da’vo qilishlaricha, Eron uchuvchisiz uchar qurilmalari yig‘ilib, sinovlardan o‘tkazilganidan keyin, Rossiya Havo-kosmik kuchlari ularni Ukrainaga qarshi urushda Rossiya dronlari bilan bir qatorda qo‘llamoqchi.

“Rossiya o‘zining Ukrainaga qarshi urushini davom ettirish uchun tobora ilojsizlik bilan tanlovlarni amalga oshirmoqda, ayniqsa, bizning misli ko‘rilmagan sanksiyalarimiz va eksport nazorati bo‘yicha choralarimiz qarshisida”, — dedi AQSH moliya vaziri o‘rinbosari Brayan Nelson.

Shuningdek, Moliya vazirligi Eronning bir nechta dron ishlab chiqaruvchilariga ham sanksiyalar e’lon qildi.

Avgust oxirida The Washington Post Eron Rossiyaga Ukrainaga qarshi urushda foydalanish uchun zarbdor uchuvchisiz uchar qurilmalarning birinchi partiyasini yetkazganini ma’lum qilgandi. Ilk sinovlar chog‘ida Eron dronlari bir necha marta ishdan chiqqan. Sentabrda The New York Times gazetasi, AQSH razvedkasiga tayanib, Rossiya KXDRdan millionlab artilleriya snaryadlari hamda kichik va o‘rta masofali raketalar sotib olayotgani haqida xabar berdi.