Axborot texnologiyalari sohasidagi xorijiy investorlar va mutaxassislarga, shuningdek, Dasturiy mahsulotlar va axborot texnologiyalari texnologik parki rezidentlarining ta’sischilari (ishtirokchilari)ga tavsiya berish tartibi to‘g‘risidagi nizom Adliya vazirligida davlat ro‘yxatidan o‘tkazildi. Bu haqda Telegram’dagi “Huquqiy axborot” kanali xabar qildi.
Nizomga ko‘ra, tavsiya quyidagilarga beriladi:
- O‘zbekistonda axborot texnologiyalari sohasini rivojlantirish uchun investitsiya kiritayotgan xorijiy investorga;
- axborot texnologiyalari sohasida oxirgi 12 oyda yillik daromadi 30 ming AQSH dollari ekvivalentidan kam bo‘lmagan xorijiy mutaxassisga;
- Texnopark rezidentlarining ta’sischisi (ishtirokchisi)ga.
Ariza va boshqa hujjatlar kelib tushgan kundan boshlab 30 kundan oshmagan muddatda Direksiya tomonidan ko‘rib chiqiladi. Direksiya ariza kelib tushgan kundan boshlab 1 kunda taqdim etilgan hujjatlarni tekshiradi.
Ariza beruvchiga quyidagi hollarda tavsiya berishni rad etish to‘g‘risida xulosa beriladi:
- ariza beruvchi tomonidan O‘zbekistonda bo‘lish qoidalari buzilganligi aniqlanganda;
- ariza beruvchi nizomda nazarda tutilgan shaxslar toifasiga kirmasa;
- ariza beruvchi nizomda belgilangan tavsiya berish uchun talablarga javob bermasa.
Tavsiya olish uchun arizalarni ko‘rib chiqish, tavsiya berish va uning muddatini uzaytirish bepul amalga oshiriladi. Tavsiya Ekspert guruhining xulosasi asosida 3 yildan ortiq bo‘lmagan muddatga beriladi.
Izoh (0)