Eron prezidenti Ozarbayjon va Armaniston o‘rtasidagi ziddiyatlar haqida gapirdi

Eron prezidenti Ibrohim Raisiy Samarqanddagi Shanxay hamkorlik tashkiloti sammitida Ozarbayjon–Armaniston masalasiga to‘xtaldi.

Uning so‘zlariga ko‘ra, Kavkaz mintaqasida tinchlik, barqarorlik va xavfsizlikning o‘rnatilishi Eron uchun juda muhim.

Biz har doim hududiy yaxlitlikni hurmat qilish va Ozarbayjon va Armaniston o‘rtasidagi tan olingan chegaralardagi har qanday o‘zgarishlarni rad etish zarurligini ta’kidlab kelganmiz. Tomonlar o‘zaro kelishmovchiliklarni muloqot orqali va xalqaro huquq asosida tinch yo‘l bilan hal qilishlari kerak.

Eron o‘z milliy manfaatlari, xavfsizligi va mintaqani himoya qilar ekan, biz ikki qo‘shni davlat o‘rtasidagi kelishmovchiliklarni bartaraf etishda yordam berishga tayyorligimizni bildiramiz, — deydi prezident.

Ma’lumot uchun, Samarqanddagi SHHT sammitida ishtiroki kutilgan Nikol Pashinyan Armanistondagi vaziyat tufayli bu jarayonda ishtirok eta olmadi.