Yevropa Ittifoqi (YI) katta ehtimol bilan, Rossiya gaziga narx chegarasini joriy etish to‘g‘risida qaror qabul qilmaydi. Bu haqda The Guardian Yevrokomissiya hujjati loyihasiga tayanib xabar berdi.
Yevropa Komissiyasi aksincha, neft va gaz kompaniyalarining ortiqcha foydasiga soliq joriy etish variantini ko‘rib chiqmoqda.
Yevropa Ittifoqi yoqilg‘i-energetika kompaniyalarining yuqori foydasiga soliq, shuningdek, kam uglerodli elektr energiyasi ishlab chiqaruvchilar foydasiga alohida cheklov joriy etishi kutilmoqda.
2022-yilda neft, ko‘mir va gaz kompaniyalari foydasi besh baravar oshishi mumkin, ular uchun “birdamlik hissasi” deb ataladigan alohida soliq joriy etiladi.
Manbaning qayd etishicha, hujjatning yakuniy matni o‘zgarishi mumkin, biroq uning loyihasi Yevrokomissiyaning Rossiya gazi narxini cheklash masalasida YI mamlakatlarining yetarlicha ko‘magini jalb qilish imkoniyatiga nisbatan shubhalarini aks ettiradi.
Bunday harakatga Rossiya gazining yirik importchilari — Vengriya, Slovakiya va Avstriya qarshi chiqqan.
Bir qator davlatlar, jumladan, Fransiya va Polsha barcha yetkazib beruvchilardan gaz narxini cheklamoqchi. Niderlandiya va Daniya har qanday cheklovlarga qarshi.
Avvalroq Yevrokomissiya Rossiya gaziga yuqori narx chegarasini joriy etishni taklif qilgani haqida xabar berilgandi.
Izoh (0)