Европа Иттифоқи (ЕИ) катта эҳтимол билан, Россия газига нарх чегарасини жорий этиш тўғрисида қарор қабул қилмайди. Бу ҳақда The Guardian Еврокомиссия ҳужжати лойиҳасига таяниб хабар берди.
Европа Комиссияси аксинча, нефть ва газ компанияларининг ортиқча фойдасига солиқ жорий этиш вариантини кўриб чиқмоқда.
Европа Иттифоқи ёқилғи-энергетика компанияларининг юқори фойдасига солиқ, шунингдек, кам углеродли электр энергияси ишлаб чиқарувчилар фойдасига алоҳида чеклов жорий этиши кутилмоқда.
2022 йилда нефть, кўмир ва газ компаниялари фойдаси беш баравар ошиши мумкин, улар учун «бирдамлик ҳиссаси» деб аталадиган алоҳида солиқ жорий этилади.
Манбанинг қайд этишича, ҳужжатнинг якуний матни ўзгариши мумкин, бироқ унинг лойиҳаси Еврокомиссиянинг Россия гази нархини чеклаш масаласида ЕИ мамлакатларининг етарлича кўмагини жалб қилиш имкониятига нисбатан шубҳаларини акс эттиради.
Бундай ҳаракатга Россия газининг йирик импортчилари — Венгрия, Словакия ва Австрия қарши чиққан.
Бир қатор давлатлар, жумладан, Франция ва Польша барча етказиб берувчилардан газ нархини чекламоқчи. Нидерландия ва Дания ҳар қандай чекловларга қарши.
Аввалроқ Еврокомиссия Россия газига юқори нарх чегарасини жорий этишни таклиф қилгани ҳақида хабар берилганди.
Изоҳ (0)