Jinoyat ishlari bo‘yicha Jizzax viloyat sudining sudlov hay’ati apellyatsiya instansiyasining navbatdagi ochiq sud majlisi bo‘lib o‘tdi. Unda sudlanuvchi R.Q.ning apellyatsiya tartibidagi shikoyati ko‘rib chiqildi, deb xabar bermoqda O‘zA.
Qayd etilishicha, R.Q.ga nisbatan Jinoyat kodeksining tegishli moddalariga ko‘ra 2 yil muddatga diniy muassasalarda ishlash huquqidan va 5 yil muddatga ozodlikdan mahrum qilish jazosi tayinlangan.
U 2013-yil 13-iyuldan Jizzax shahar “Obod” mahallasi hududida joylashgan “Imom Buxoriy” jome masjidi imom xatibi vazifasida ishlab kelgan. Faoliyati davomida “Imom Buxoriy” masjidi ustaviga hamda O‘zbekiston Musulmonlar idorasining “Masjidlarda naqd pul mablag‘lari aylanmasining oldini olish hamda ehson qutilaridan foydalanishni tartibga solish xususida”gi buyruq talablariga rioya qilmagan.
Buning oqibatida fuqaro A.B.tomonidan masjid uchun xayriya qilingan, ya’ni masjidni qaytadan qurish ishlarini boshlash uchun berilgan 190 million so‘m xayriya pullari masjid hisob raqamiga kirim qilinmagan. Bu pul mablag‘larini imom xatib o‘zlashtirish yo‘li bilan talon-toroj qilib yuborgan.
Bundan tashqari, u Bahor plastics MCHJ rahbariyati tomonidan xayriya qilingan 30 million so‘mlik kir yuvish kukunlaridan tushgan pullarni masjid hisob raqamiga kirim qilmagan.
Shuningdek, sudlanuvchi tanishi J.Q.ni ham masjid qurilishi uchun moddiy yordam berishga ko‘ndirib, 5 ming dollarini qo‘lga kiritgan. Bu pullar ham masjid hisob raqamiga kirim qilinmagan.
Sudlanuvchi R.Q. o‘z shikoyatida birinchi instansiya sudi ishni bir tomonlama ko‘rib chiqqanini, oilaviy ahvolini, qaramog‘ida voyaga yetmagan farzandlari borligini inobatga olib, ishni adolatli ko‘rib chiqishni so‘ragan. Shuningdek, u mazkur masjidda to‘qqiz yildan buyon mehnat qilishini, masjidga ko‘p mehnati singganini, unga qo‘yilgan ayblovga to‘liq iqror emasligini bildirgan.
Sudlanuvchining sud hukmida ko‘rsatilgan jinoyatni sodir qilgani sud majlisida so‘roq qilingan jabrlanuvchilar va guvohlarning ko‘rsatuvlari, arizalari, tushuntirish xatlari, SMS yozishmalaridan nusxalar, jinoyat ishida to‘plangan dalillar bilan to‘liq o‘z tasdig‘ini topgan.
Birinchi instansiya sudi dalillar va asoslarga tayanib, uning jinoiy harakatini Jinoyat kodeksining 167-moddasi (talonchilik) 3-qismi “a” bandi bilan to‘g‘ri kvalifikatsiya qilingani to‘g‘risida to‘xtamga kelgan.
Xulosalar natijasiga ko‘ra, unga Jinoyat kodeksining 45-moddasiga asosan muayyan huquqidan mahrum qilish qo‘shimcha jazosini qo‘llagan holda, 167-moddasi 3-qismi sanksiyasi doirasida ozodlikdan mahrum qilish jazosi tayinlangan.
Yuqoridagilarga ko‘ra, apellyatsiya instansiyasi sudi, sud hukmini o‘zgarishsiz, apellyatsiya shikoyatini qanoatlantirishsiz qoldirishni lozim topgan.
Izoh (0)