Жиззахда масжид қурилиши учун хайрия қилинган 220 млн сўм ва 5 минг долларни ўзлаштирган имом-хатибга суд ҳукми ўқилди

Жиноят ишлари бўйича Жиззах вилоят судининг судлов ҳайъати апелляция инстанциясининг навбатдаги очиқ суд мажлиси бўлиб ўтди. Унда судланувчи Р.Қ.нинг апелляция тартибидаги шикояти кўриб чиқилди, деб хабар бермоқда ЎзА.

Қайд этилишича, Р.Қ.га нисбатан Жиноят кодексининг тегишли моддаларига кўра 2 йил муддатга диний муассасаларда ишлаш ҳуқуқидан ва 5 йил муддатга озодликдан маҳрум қилиш жазоси тайинланган.

У 2013 йил 13 июлдан Жиззах шаҳар «Обод» маҳалласи ҳудудида жойлашган «Имом Бухорий» жоме масжиди имом хатиби вазифасида ишлаб келган. Фаолияти давомида «Имом Бухорий» масжиди уставига ҳамда Ўзбекистон Мусулмонлар идорасининг «Масжидларда нақд пул маблағлари айланмасининг олдини олиш ҳамда эҳсон қутиларидан фойдаланишни тартибга солиш хусусида»ги буйруқ талабларига риоя қилмаган.

Бунинг оқибатида фуқаро А.Б.томонидан масжид учун хайрия қилинган, яъни масжидни қайтадан қуриш ишларини бошлаш учун берилган 190 миллион сўм хайрия пуллари масжид ҳисоб рақамига кирим қилинмаган. Бу пул маблағларини имом хатиб ўзлаштириш йўли билан талон-торож қилиб юборган.

Бундан ташқари, у Баҳор пластиcс МЧЖ раҳбарияти томонидан хайрия қилинган 30 миллион сўмлик кир ювиш кукунларидан тушган пулларни масжид ҳисоб рақамига кирим қилмаган.

Шунингдек, судланувчи таниши Ж.Қ.ни ҳам масжид қурилиши учун моддий ёрдам беришга кўндириб, 5 минг долларини қўлга киритган. Бу пуллар ҳам масжид ҳисоб рақамига кирим қилинмаган.

Судланувчи Р.Қ. ўз шикоятида биринчи инстанция суди ишни бир томонлама кўриб чиққанини, оилавий аҳволини, қарамоғида вояга етмаган фарзандлари борлигини инобатга олиб, ишни адолатли кўриб чиқишни сўраган. Шунингдек, у мазкур масжидда тўққиз йилдан буён меҳнат қилишини, масжидга кўп меҳнати сингганини, унга қўйилган айбловга тўлиқ иқрор эмаслигини билдирган.

Судланувчининг суд ҳукмида кўрсатилган жиноятни содир қилгани суд мажлисида сўроқ қилинган жабрланувчилар ва гувоҳларнинг кўрсатувлари, аризалари, тушунтириш хатлари, SMS ёзишмаларидан нусхалар, жиноят ишида тўпланган далиллар билан тўлиқ ўз тасдиғини топган.

Биринчи инстанция суди далиллар ва асосларга таяниб, унинг жиноий ҳаракатини Жиноят кодексининг 167-моддаси (талончилик) 3-қисми «а» банди билан тўғри квалификация қилингани тўғрисида тўхтамга келган.

Хулосалар натижасига кўра, унга Жиноят кодексининг 45-моддасига асосан муайян ҳуқуқидан маҳрум қилиш қўшимча жазосини қўллаган ҳолда, 167-моддаси 3-қисми санкцияси доирасида озодликдан маҳрум қилиш жазоси тайинланган.

Юқоридагиларга кўра, апелляция инстанцияси суди, суд ҳукмини ўзгаришсиз, апелляция шикоятини қаноатлантиришсиз қолдиришни лозим топган.