Shifokor Maqsud Mallayev “Daryo”ga bergan intervyusida O‘zbekistondagi ayrim muammolar, xususan, korrupsiya masalasida fikrlarini bildirdi.
Maqsud Mallayevning aytishicha, uning badavlat do‘stlaridan biri aynan korrupsiya sababli O‘zbekistonni tark etgan.
“Bizga vatanparvarlik tuyg‘usi juda zarur. Bu balandparvoz gapdek tuyuladi. Kim chet elda yashab ko‘rgan bo‘lsa, buni yaxshiroq his qiladi. Bir o‘rtog‘im Amerikadan juda katta g‘oya va summalar bilan vatanimizga keldi. “Aytishnik” edi, IT maktabini ochdi. O‘zbekistonga juda katta pul tikdi.
“Vatanim uchun qilay shu ishlarni”, dedi. Shu vatanda tug‘ilgan har bir odam agar shu darajadagi ishlarni qila olganda O‘zbekiston hozir rivojlanish bo‘yicha Dubaydan ham o‘tib ketardi. Keyin u Amerikaga yana ketib qoldi. Nega ketding, desam, shunday javob berdi: “O‘zbekistonda har bir qilmoqchi bo‘lgan ishing uchun ‘tashlab turishing’ kerak ekan. Ya’ni har bitta qilinadigan ishing kimnidir boqish bilan, kimgadir tiz cho‘kish bilan bitadi. Nima qilaman bu yerga pul tikib, kettim u yoqda yashayman. U yoqda hamma teng”, dedi. Vatanparvar bo‘lib qaytib kelgan odam ishiga halal berish, uni sindirib yuborish kerak emas”, – dedi shifokor.
Shuningdek, shifokor 10 yildan keyingi O‘zbekiston tibbiyotini qanday tasavvur qilishini aytdi.
“O‘n yildan keyingi holatni boshqa davlatlar bilan taqqosiy hisoblaydigan bo‘lsak, buning uchun u davlatlar to‘xtab turishi kerak. Chunki ular ham o‘n yillab tinch turmaydida, oldinga qarab ketadi. Hozirgi paytda bizning tibbiyotimizda oldinga qarab yurish juda ham sekin. Olingan narsalarni ko‘z-ko‘z qilishimiz mumkin. Masalan, 50 ta “tez yordam” avtomobillari, 200 ta UZI apparatlari olindi”, deb maqtanish mumkin. Lekin bu tibbiyot emas. Tibbiyotga kadr kerak. Qani kadr? Mana shu 200 ta apparat yoniga 200 nafar mutaxassisni o‘tirgizib qo‘ysin, undan keyin “biz 200 ta UZI tizimini yo‘lga qo‘ydik”, desin.
Mana shu narsa tibbiyot deyiladi. Oldinga qarab ketishimiz sust deganimiz, bizda tibbiyot kadrlar masalasida oqsayapti. Agar shu zaylda kadrlar chet elga chiqib ketaversa, borlari ham biologik yoki boshqa sabablar tufayli yo‘qolib borsa, 10 yildan keyin ancha orqaga ketib qolishimiz mumkin. Chunki hozirgi paytda kadrlar almashinuv jarayonida bo‘shliqlar katta. Ularni oldindan hisobga olib, to‘lidirib borish kerak”, – dedi Maqsud Mallayev.
Izoh (0)