Ukraina prezidenti Vladimir Zelenskiy mamlakat Qurolli kuchlari Xarkov viloyatida Rossiya istilosi ostida bo‘lgan 30 dan ortiq aholi punktlarini ozod etganini ma’lum qilidi, deb yozadi Meduza. Bu haqda u urushning 198-kuni yakunlariga bag‘ishlangan videomurojaatida aytib o‘tdi.
“Bizning armiyamiz, Ukraina razvedkasi va Xavfsizlik xizmati bir nechta tezkor yo‘nalishlarda faol harakatlarini davom ettirmoqda. Muvaffaqiyatli davom ettirmoqda… Ayni paytda Ukraina Qurolli kuchlari Xarkov viloyatida 30 dan ortiq aholi punktini ozod qildi va nazorat ostiga oldi… Asta-sekinlik bilan yangi aholi punktlarini nazorat ostiga olyapmiz — hamma joyga Ukraina bayrog‘ini va barcha fuqarolarimiz uchun himoyani qaytaryapmiz”, — dedi Zelenskiy.
Ukraina prezidenti mamlakat harbiylari ozod etgan aholi punktlarining nomlariga aniqlik kiritmadi. 8-sentabr kuni u Xarkov viloyatining Izyum tumanida Ukraina Qurolli kuchlari qo‘li ostiga o‘tgan Balakleya shahridan video e’lon qildi. Ukrainaning “Fokus” nashri ma’lum qilishicha, 9-sentabr holatiga Xarkov viloyatida 17 ta aholi punkti ozod qilingani ma’lum, ammo ro‘yxat to‘liq emas.
5-sentabr kuni Ukraina armiyasi Xarkov viloyatida hujumga o‘tishni boshladi va mamlakat Qurolli kuchlari Bosh shtabi bayonotiga ko‘ra, uch kun ichida 50 km ichkariga kirib borilgan. O‘n mingdan ortiq rossiyalik harbiy xizmatchilar qamalga tushib qolish xavfi ostida turibdi.
Vladimir Zelenskiy 8-sentabr kuni oy boshidan buyon Ukraina Qurolli kuchlari 1000 kvadrat kilometrdan ortiq hududni ozod etganini ma’lum qilgandi.
Izoh (0)