Россия Сурияда ноқонуний гуруҳ етакчисини йўқ қилди. У Петербург метросидаги терактга алоқадорликда айбланганди

Сурияда «Котиба ат-Тавҳид вал-Жиҳод» ташкилоти етакчиси Сирожиддин Мухторов ўлдирилди, бу ҳақда Россиянинг Сурияда душман томонларни яраштириш маркази раҳбари ўринбосари генерал-майор Олег Егоров маълум қилди, деб ёзади Meduza.

Егоровнинг сўзларига кўра, Мухторов 8 сентябрь куни Россия Ҳаво-космик кучлари томонидан Идлиб вилоятидаги жангарилар лагерига берилган зарба оқибатида ҳалок бўлган. Шунингдек, яна бир террорчилик ташкилоти — «Жибҳот ан-Нусра»нинг 20 дан ортиқ юқори мансабли аъзолари ҳам ўлдирилган.

«Котиба ат-Тавҳид вал-Жиҳод», БМТ маълумотларига кўра, «Ал-Қоида» гуруҳига алоқадор бўлиб, Суриядаги Ҳама, Идлиб ва Латакия вилоятларида фаолият олиб боради. Унинг таркибида 500 га яқин жангари бор.

Россия махсус хизматлари ва тергов органлари талқини бўйича, «Котиба ат-Тавҳид вал-Жиҳод» 2017 йилда Санкт-Петербург метросида юз бериб, 15 кишининг ўлимига ва 100 га яқин одамнинг жабрланишига сабаб бўлган терактни ташкиллаштиришга алоқадордир. Терактга, гўёки, Россиянинг Суриядаги жанговар ҳаракатлари сабаб бўлган.

Тергов Сирожиддин Мухторовни теракт буюртмачиси деб атаганди. У Қирғизистонда туғилиб-ўсиб, кейин Сурияга кетган. У ерда «Котиба ат-Тавҳид вал-Жиҳод» гуруҳи тузилган, у ўз олдига бутунжаҳон шариат давлатини барпо этишни мақсад қилиб қўйган. Россия тергов органларига кўра, у Қирғизистон, Ўзбекистон ва Тожикистон фуқароларини ўз ичига олган.

Уларнинг талқини бўйича, Петербург метросида бомба портлатган худкуш Акбаржон Жалилов «Котиба ат-Тавҳид вал-Жиҳод» гуруҳи аъзоси бўлган. Жалиловга терактни тайёрлашда ёрдам берган, иш бўйича айбланувчилар ҳам ушбу гуруҳ иштирокчилари деб аталган. Улар (11 киши) айбига иқрор бўлмади ва кўрсатмаларни қийноқлар остида берганини маълум қилди. Шунга қарамай, уларга 19 йилдан бутун умргача бўлган муддатлар тайинланди.

Петербург метросидаги портлашдан кейин бир неча ҳафта ўтиб, теракт учун жавобгарликни «Котиба ал-Имом Шамил» гуруҳи ўз зиммасига олгани ҳақида маълумот пайдо бўлди, у, тахминларга кўра, «Ал-Қоида» билан боғлиқдир. Аммо суд мажлисларида бу ташкилот тилга олинмаган.